Bestað blaður Jóa

2009 örannáll

2010-02-01T08:58:00.003Z

Q1 2009:
Kenni Þróun Hugbúnaðar með Dr. Ebbu við Háskóla Íslands
Tek kúrsinn Stjórnun Fyrirtækja
Vinn í mastersverkefni

Q2 2009:
Held áfram námi og kennslu,
Pabbi 50. ára
Mastersverkefni fer að deyja drottni sínum
Sæki um hjá CCP
Undirbý mitt eigið sumarnámskeið hjá HÍ
Svaðalegt 'hring'ferðarlag með Gumma, Villa, Gulla og Krúsa, farið á Lakagíga, þaðan austur á land, þaðan inn að Snæfelli og Kárahnjúkum, svo alla leið til Mývatns og síðan Sprengisand til baka.

Q3 2009:
Kenni forritun í .NET umhverfi með áherslu á C# hjá HÍ
Byrja að vinna hjá Annata
Fæ vinnu hjá CCP
Hætti hjá Annata
Byrja hjá CCP í byrjun Ágúst
Kemst að því að ég er að verða pabbi

Q4 2009:
Kem fram í útvarpi í fyrsta skipti í 9 ár
Kemst að því að barnið er strákur
Lára verður 29. ára
Fer út til Atlanta á vegum CCP og er þar í 2 vikur
Jól og Áramót

Á ég bloggsíðu?

2009-12-29T23:58:00.001Z

Jæja, ætli maður þurfi ekki að fara að lífga upp á þessa greyið!

Ætli það komi annáll? Sýnist sem ég skuldi mér og öðrum það m.v lága bloggtíðni á árinu!

Smáatriði sem fara í taugarnar á mér

2009-03-20T16:13:00.002Z

Vodafone - Rukka leigu upp á 350 kall fyrir dsl sjónvarpsmótakara sem ég þarf að borga 790kr fyrir í áskrift aukalega og svo 690 kr tryggingargjald á ári. Auglýsing segir 790kr en í raun kostar þetta þig 1200 kr á mánuði að fá ADSL Sjónvarp hjá Vondafone. Það er munur um 410 kr á mánuði! Ergo ekki fá þér sjónvarp hjá vodafone nema þú neyðist til þess.

Heimabanki Kaupþings - Það er gjörsamlega ómögulegt að skoða reikninga sína þarna. Þeir nota javascript til að posta beiðnum af listanum sem kemur þegar þú hefur valið þér dagsetningar reikninga. Þú getur því ekki haldið t.a.m control inni og opnað alla reikninga í sér flipa í browsernum. Þegar þú reynir svo að fara til baka úr reikningi yfir í yfirlitið þá kemur alltaf spurning um það hvort þú viljir endursenda beiðni. Þetta er handónýtt helvítis drasl!

Þjóðskrá og upplýsingakerfi sem nota hana - Ég skráði mig inn til landsins í Ágúst 2008. Í Desember 2008 skráði ég mig svo í Skálagerðið! Samt er enn mörg kerfi sem halda að ég búí í Danmörku. Common! Þetta er ótrúlega lélegt! Ég var 18 ára þegar ég fyrst útfærði scriptu sem las inn þjóðskráarupload frá Skýrr í gegnum ftp og parsaði upplýsingarnar inn í gagnagrunn miðasölukerfisins sem ég bjó til, fyrir að verða 9 árum síðan! Þetta á ekki að sjást. Sérstaklega fór þetta í taugarnar á mér þegar ég skráði mig inn á rafræna neytendastofu til að kvarta yfir vodafone. Opinber vefur segir mér að ég sé búsettur í Danmörku!

Mikið er gott að fá útrás fyrir svona hluti á bloggi.

Fimmtudagsmáltíðin út önnina

2009-03-19T13:12:00.001Z

Svona verður þetta hjá mér næstkomandi fimmtudaga.

Hamborgari og internet á Café Ólver, 500 kall!

ÖSE á Íslandi

2009-03-18T19:14:00.002Z

Ég fagna komu ÖSE til Íslands til þess að fylgjast með kosningum.
Ég fagna þess að núna verður ekki lengur hægt að slá ryki í augu Íslendinga né útlendinga með það að hér sé engin spilling. Það þýðir ekkert að staðhæfa eitthvað svona, það er lang farsælast að hafa eftirlitsferla stöðugt í gangi óháð væntu spillingastigi.

... Ég vona bara að við séum ekki að borga fyrir þjónustu ÖSE.

Niðurfærsla skulda

2009-03-18T15:37:00.003Z

Sem eigandi peninga í litlu magni og skulda frá LÍN þá verð ég bara að impra á því að afnám bindiskyldu á verðtryggðum reikningum hlýtur að skila sér í aukinni innlendri neyslu. Það hjálpar eflaust líka hópi fólks að borga skuldir sínar.

Ef skuldir verða eitthvað færðar niður, þá á að gera það yfir línuna en samt með hámarki. Semsagt, komið til móts við þá sem eiga peninga með að losa um þá, og afskrifið allar tegundir skulda, ekki bara skuldir færðar í nýju bankana!

Sem dæmi, ef að lækkun skulda verður 20% á línuna þá þarf hámark á niðurfærsluna, segjum 3 milljón krónur per kennitölu. Ég krefst þess þá að LíN skuldin mín færist niður um 20%, sem er töluvert minna en 3 milljónir!

Ísland hf

2009-03-15T02:24:00.003Z

Í kjölfar prófkjara þá ætla ég að varpa fram Íslandi hf. Þetta er hugmynd sem er eflaust frekar spes að setja núna fram í brunarústum frjálshyggju. En Ísland hf er nokkurnveginn svona:

Hver einasti ríkisborgari á jafnan hlut í Íslandi. Ef það er hagnaður af rekstri ríkisins þá er greiddur út arður til allra hluthafa. Ekki er hægt að selja, kaupa hlut eða taka veð í honum að neinu leiti og bannað með öllu að breyta því seinna meir.

Lífeyrissjóðskerfi landsins er svo einfaldað þannig að hver hluthafi kaupir í skuldabréfasjóði ríkisins í stað þess að leggja inn á frjálsan lífeyrissjóð. Þannig fjármagnar hver einstaklingur rekstur Íslands hf sem hann á hlut í á sem hagkvæmastan og einfaldasta máta.

Við þetta þá yrði það hagur allra að Íslandi hf gangi sem best og þingmenn og ráðherrar þurfa að hugsa sig tvisvar um áður en þeir spreða, hvort væri betra að spreða í eitthvað eða geta greitt út meiri arð til kjósenda á næsta ári.

Það er gaman að hugsa út fyrir kassann, verðandi mögulegir þingmenn þurfa að gera það og reyna að hugsa í lausnum. Frambjóðendur sem fara bara með tuggur um að ná niður verðbólgu og lækka stýrivexti eru ekki að setja fram hugmyndir, það er einfaldlega að endurtaka vandamálið!

Mastersverkefnið

2009-03-13T12:41:00.003Z

Líkt og vonandi margir sem mig þekkja vita, þá hef ég verið að vinna að mastersverkefni undanfarna mánuði. Fáir vita þó nákvæmlega hvað það snýst um. Þessi færsla er tilraun til þess að hafa það aðeins meira á hreinu.

Í fyrstu smá forsaga:
Ég lærði nokkuð um þýðendur, smíði forritunarmála og notkun umdæmismála (mín þýðing af domain specific language) til að búa til forrit þegar ég var úti í SDU. Þegar ég kom heim til Íslands í eitt skiptið þá talaði ég við Kristján varðandi mastersverkefni og leiddi það til þess að ég ræddi við CCP.

CCP höfðu gert spilaleik kallaðan Eve the card game sem þeim langaði að fá á tölvutækt form. Datt mér þá í hug að nota umdæmismál til að lýsa leiknum og út frá lýsingu einni saman búa til keyranleg tilvik af leiknum í tölvu. Ætlunin var að CCP myndi láta mig fá forritara til aðstoðar svo ég taldi þetta allveg geranlegt.

Eitt leyddi af öðru og samskipti við CCP urðu þess eðlis að ég ákvað að byrja á að gera spilaleik af öðrum meiði til að byrja með, og nota svo þá vinnu til að gera Eve the card game seinna meir. Sá spilaleikur sem varð fyrir valinu var Póker.

Nú er kannski kominn tími á rannsóknarspurninguna:

Hvert er hlutfall fyrirhafnar milli þess að gera ákveðna hugbúnaðarlausn og þess að búa til umdæmismál fyrir þá hugbúnaðarlausn, sem svo má nota til þess að búa sjálfkrafa til sömu hugbúnaðarlausn og svipaðar hugbúnaðarlausnir.

Athugið, að vanalega eru öll dæmi um umdæmislausnir sértækar á tæknilegu sviði, þ.e.a.s, umdæmismál sem auðveldar það að búa til gagnasöfn, umdæmismál sem auðveldar það að búa til viðmót, o.s.fv. Það eru mun færri dæmi um umdæmismál sem hjálpar til við að gera lausn sem krefst viðmóts, gagnvirkni, regluverks, o.s.fv.

Það kom svo á daginn að það að forrita Póker rétt, með gagnvirkni, grafísku viðmóti, spilareglum og öllu heila var töluverð vinna. Í dag hef ég sæmilega kláraða lausn af því vandamáli útfærða í C#. Þetta hefur tekið mikinn tíma. Ég er loksins að komast á skref 2 sem er það að búa til umdæmismál út frá því sem ég hef forritað. Kóðinn sem ég hef á bakvið pókerinn slagar í kringum 1500 línur og þó hef ég endurskrifað þann kóða nokkrum sinnum og notað bestu tól til þess að gera hann af sem mestum gæðum.

Það hefur farið nokkur tími í að skoða lausnir sem hjálpa til við að búa til umdæmismál og varpa því máli svo yfir í kóða. Þær helstu eru Xtext og openArchitectureWare, ANTLR og stringTemplate, DSL Tools, Oslo og Irony

Ég hef enn ekki tekið endanlega ákvörðun hvaða tól ég ætla að nota, en þó er ég farinn að hallast að AntLR og StringTemplate þar sem þetta er lang þroskaðasta og hreinasta aðferðin. Oslo er í betu, DSL tools er grafískt og viðbjóðslegt og oAW er hreinlega of flókið, fyrirferðamikið og svo er það að leysast upp í undirverkefni innan Eclipse. Irony er reyndar lítið og töff, en mögulega of háð c#.

Það skal athugast að ég ætla mér að búa til mál sem er óháð keyrsluútfærslu, þ.e.a.s, ef ég skilgreini póker í mínu máli, þá vil ég geta varpað því í aðrar útfærslur en bara c# útfærsluna sem ég á uppkast að. Þessvegna er ég að gera það sem kallast á ensku "External textual DSL", en umdæmismál má líka hafa innbyggð í hugbúnaðarlausn, en þá er það vanalega túlkað í keyrslu þeirrar lausnar.

Þau sem gátu skilið þessa bloggfærslu hafa þá núna getað glöggvað aðeins inn í minn skrítna heim og skilja þá aðeins betur hvað ég er að skoða í mínu mastersverkefni.

Minn kosningarlisti í Reykjavík

2009-03-09T11:29:00.002Z

Svona kaus ég fulltrúa S í Rvk:

1. Jóhanna Sigurðardóttir
2. Jón Baldvin Hannibalsson
3. Sigríður Ingibjörg Ingadóttir
4. Mörður Árnason
5. Anna Pála Sverrisdóttir
6. Dofri Hermannsson
7. Sigurbjörg Sigurgeirsdóttir
8. Pétur Tyrfingsson

Fixing NMI: Parity Check/ Memory Parity Error BSOD

2009-03-05T20:02:00.003Z

Ensure your memory is OK.

If your memory is not corrupted, run scandisk on your system partition with the /r parameter.
To do that, either plug your hard-drive to another computer or make a proper boot-disk like UBCD4Win.

If your system still has problems, and won't boot, try repairing through windows setup.
That worked for me. Seems like I got this problem due to windows trying to compress some critical files it deemed were old and rarely used. I somehow suspect that window cannot use compressed system files until it has loaded some services, of which it had already compressed some critical files.

Post-cocious: Free MP3 album "Overcast" now available

2009-02-28T11:24:00.002Z

Vinur minn frá San Fran, hann Anu Kirk var að klára þriðju Febrúar RPM plötuna sína.
Mikið er maðurinn magnaður, hann vinnur sem aðal þróunarstjóri Raphsody en tekst samt hvern febrúar síðustu 3 ár að klára heila plötu og gefa út.

Þið getið nálgast þessa snilld frítt með að smella hér.

Jöfnuður og vitsmunaflótti

2009-02-25T13:03:00.003Z

Ég ætla að biðla til annara jafnaðarmanna að passa upp á það að fólk fái kost á launum sem eru í einhverju samhengi við nám þess og eftirspurn eftir starfshæfileikum. Flest öll laun á Íslandi eru í dag lág miðað við sambærileg störf erlendis vegna falls krónunnar. Ásamt slælegu atvinnuöryggi duga lág laun hérlendis vegna gengis til þess að margt hæft fólk lítur út fyrir landsteinana.

Ef að ofur-sósíalískar aðgerðir líkt og það að allir heilbrigðistarfsmenn fari að fá svipuð laun fara að koma á daginn, þá verður hér svakalegur vitsmunaflótti í heilbrigðisstéttinni. Það vill svo til að eftirspurn eftir starfsfólki í heilbrigðisgeiranum er mest í heiminum þessa stundina, þrátt fyrir heimskreppu.

Upp á þetta þarf því að passa, því við viljum hafa hér öflugt og gott heilbrigðiskerfi fyrir alla þjóðfélagsþegna.

Markmið Seðlabanka Íslands

2009-02-25T00:46:00.003Z

Seðlabanki Íslands á að halda verðbólgu innan 2.5%.

Þetta hefur honum ekki tekist undanfarin ár. Þessu aðalmarkmiði hefur alls ekki gengið að nálgast að nokkru leiti heldur hefur það stöðugt fjarað undan. Í dag er verðbólgan að mælast í kringum 18+% á ársgrundvelli.

Sökum hræðilegs árangurs við að ná meginmarkmiðum stofnunarinnar eiga allir Seðlabankastjórar að axla ábyrgð og víkja.

Flott hjá þér Björgvin!

2009-01-25T13:30:00.003Z

Ég ætla að lýsa yfir stuðningi mínum við gerðir Björgvins G. Sigurðssonar.

Þótt það hafi tekið langan tíma þá má hann eiga það að nú er í fyrsta skipti ráðherra að axla pólítíska ábyrgð með því að láta af embætti.

Glæsilegt!

Styrking krónu í pólítísku umróti

2009-01-23T13:22:00.004Z

Ef að Seðlabankinn hefur ekki verið að styrkja krónuna með handafli, þá er ansi áhugavert að spá í því afhverju krónan hefur verið að styrkjast í viku sem hefur haft í för með sér hörðustu og lengstu mótmæli samtíðarinnar gegn sitjandi stjórn.

Síðan er enn áhugaverðara hversu mikið krónan hefur styrkst aðeins í dag þegar vitað var að tíðinda var að vænta frá Valhöll.

Ég er feginn því að núna á að kjósa, þetta gerir mig bjartsýnan og vorið leggst vel í mig. Núna munu menn sæta ábyrgð á gjörðum sínum og þá eykst tiltrú þjóðarinnar og tiltrú erlendis á að okkur takist að komast í gegnum núverandi erfiðleika.

Gott mál.

Bíð svo spenntur eftir að sjá viðbrögð þingflokks Samfylkingarinnar sem og formanns við þessari yfirlýsingu og hvernig spunið verður úr grautnum.

Spuni Sollu

2009-01-22T20:18:00.002Z

Hvað ætlar Solla að segja og gera á morgun eiginlega? Hvernig á ríkisstjórnin að sitja áfram fram að kosningum sem samt eiga að vera í vor? Hvernig á að vera hægt að fá það til að ganga upp þegar ekki var einusinni hægt að fá nokkurn mann til að sæta ábyrgð í þessu ríkisstjórnarsamstarfi?

Ætlar Solla með Samfylkinguna undir 10% fylgi með þessu? Hversu spennt verða þá þau fáu sem að baki henni munu þá standa verða fyrir því að fara út í kosningar? Hvað með Geir og félaga? Þetta er stórfurðulegt!

Það verður að leysa þennan hnút fyrir eða um helgina. Ef ríkisstjórnin ætlar að reyna að vera uppvakningur sem veður hér áfram vegna einhvers stórvandamáls með nýju viðskiptabankana, þá verða þau að gera nákvæmlega grein fyrir því hvernig það getur í raun verið svo stórt að það haldi þessari stjórn hér gangandi í núverandi umhverfi.

Ég hreinlega skil þetta bara ekki. Það verður mjög áhugavert að sjá morgundaginn. Ef ekkert gerist á morgun þá verður þessi helgi vægast sagt söguleg.

Heildun, diffrun og mótmæli

2009-01-22T10:59:00.003Z

Það væri óskandi að fólk hefði almennt tilfinningu fyrir heildun og diffrun og gæti sett upp diffurjöfnur...

Jú, því það mætti líkja hámarksfjölda mótmælenda fyrir gefin dag við hæsta punkt í stöðuvatni. En í stöðuvatnið rennur vatn inn og það rennur út. Í hóp mótmælenda gerist það sama, fólk kemur og fer, ekki nándar því allir eru á staðnum allan tímann.

Að nota tölu yfir mat á mesta fjölda mótmælenda segir lítið til um fjölda þeirra yfir daginn. Rétt einsog að lítrafjöldi í stöðuvatni þegar það stendur sem hæst er ekki sá fjöldi lítra sem hefur í heild sinni runnið í gegnum vatnið yfir daginn.

Ég get vel trúað því að vel yfir 10.000 einstaklingar hafi í einu eða öðru komið á mótmælin hérna í Reykjavík. Það er því mikilvægt að átta sig á flæði fólks inn og út af mótmælunum til að geta tekið rétt pólítískt mat á gildi þeirra.

Brotin þjóð

2009-01-20T19:38:00.004Z

Meðan Bandaríkjamenn sameinast í gleði og von á bakvið nýjan forseta sem kosinn var í miðri kreppu og fjármálahruni í Bandaríkjunum, þá brotnar þjóðin hér á alþingishúsinu.
ESB eða ekki ESB, ég held að kosningar brenni meira á núna.

Kosningar til að auka trúverðugleika okkar, skapa frið í landinu og veita nýrri forystu pólítískt umboð til aðgerða.

Núverandi ríkisstjórn fær engan frið til vinnu frá lýðnum, og á ekki að gera það.

Við þurfum breytingar, við þurfum endurbætt lýðræði, við þurfum kosningar.

Og við þurfum ekki að hugsa um 4 ára kjörtímabil á næstunni. Ég spái því að það verði nokkrar kosningar haldnar hér fram til ársins 2012.

Þankar um peningamál

2009-01-05T19:00:00.004Z

Hvað væri óskastaða varðandi peningamál og tengd málefni?

1. Stöðug og trygg mynt sem heldur verðgildi sínu.

2. Aðhald í opinberum fjármálum þar sem nýting á fé verður hámarkuð
m.t.t jákværða áhrifa þess á gæði samfélagsins. Samfélagsleg gæði
eru góð atvinnuskilyrði, arðbær framleiðsla, velferðarþjóðfélag
með mikilli atvinnuþáttöku og rannsóknarstarfsemi. Nýting náttúruauðlinda hámarkuð
m.t.t sjálfbærni.

3. Réttlátt, gott og gegnsætt skattakerfi. Tollar lágmarkaðir ef Ísland verður partur af myntbandalagi. Annars þarf að beita tollum á skynsamlegan máta. T.a.m ættu engir tollar að vera á innflutningi hrávöru eða tækja til framleiðslustarfsemi þegar því er við komið.

4. Öflugar eftirlitsstofnanir með ákvæðum um ábyrgð þeirra sem þær reka og atriði sem leiða til sjálfkrafa uppsagnar ábyrgðaaðila.

5. Lög sem eru sem einföldust og gallalaus. Svo atriðin að ofan verði framkvæmanleg á sem bestan máta.

6. Öflugara lýðræði svo fyrr væri hægt að koma böndum á yfirgengilega frjálshyggju eða rakinn sósíalisma. Andstæðar hugmyndir þurfa að geta tekist betur á, bæði í framkvæmd sem og í lögum. Óskandi væri að hér myndi koma svipað pólítískt umhverfi og í kringum okkur, minnihlutastjórn sem gæti ekki nauðbeygt þingið undir sig.
Burt með framkvæmdarvaldsalræði, deila völdum almennilega milli framkvæmdarvalds, löggjafarvalds og dómsvalds.

7. Til að betur væri hægt að fylgja ofangreindum punktum eftir þyrftu öll opinber gögn, nema sá hluti gagnastaka sem væri sérstaklega tilgreindur af persónuvernd, að vera aðgengileg á rafrænu formi í rauntíma. Það myndi leiða af sér að almenningur gæti auðveldar veitt aðhald að ríkinu og að stór hluti umræðu um pólítík gæti verið byggður á raunverulegum gögnum. Þetta myndi kosta peninga. En þetta myndi spara peninga til lengri tíma litið, enda eru öll upplýsingakerfi byggð á gögnum og gögn sem hægt er að skoða í rauntíma eru komin í þannig ferli að gæði þeirra eru mikil og auðvelt er að byggja kerfi ofan á þau.

Our Iceberg Is Melting!

2008-12-03T15:00:00.005Z

Ég hef verið á kafi í flutningum síðan fyrir helgi. Við Lára erum loksins komin með þessa fínu leiguíbúð í hjarta Reykjavíkur (lesist, smáíbúðahverfið) og erum komin langt á veg með að koma okkur fyrir. Ég er á því stigi núna að vera að tína til dót sem varð eftir í Geitlandinu og Mosó. T.a.m þá fann ég mér til skemmtunar eina bók sem ég á, en hún heitir Our Iceberg is Melting. Kaldhæðnin er sú að Kaupþing gaf öllum starfsmönnum sínum eintak af þessari bók í kringum jólin 2006.

Ég man að ég las hana orð fyrir orð og þótti ágæt, ef einföld, saga um breytingar og hvernig tekist er á við þær. Spurning hvort að Geir, Davíð og fleiri hafi fengið bókina í gjöf?

En því miður þá fór það svo að bankaísjakinn bráðnaði eftir allt saman.

Áttirðu við: 10 million dollars? Nei því miður

2008-11-20T16:25:00.000Z

Við sjáum mynd

Fyrstu skref til að varðveita UT hæfni Íslands stigin

2008-11-20T12:48:00.002Z

Microsoft hefur boðið upp á fast gengi við íslenska aðila svo endurnýjun leyfa, kaup á nýjum búnaði og rekstur þeirra verður þá viðráðanlegri á meðan hrunið gengur yfir. Núna er bara að sjá þetta koma frá fleirri aðilum, t.a.m Oracle, Cisco og IBM. Annars á opinn hugbúnaður eflaust eftir að eflast hérlendis í kreppunni sem er gott mál.

Ég vildi bara að Steam myndi bjóða mér upp á fast gengi dollars, segjum 100 kr per dollar, því ég hreinlega tími ekki að kaupa Left 4 Dead á núverandi gengi og verði!

Veruleikafirring leigusala

2008-11-19T19:20:00.005Z

Undanfarið hef ég verið að skoða leigumarkaðinn. Leiguverð hefur fallið talsvert og núna eru farnar að sjást íbúðir þar sem leiguverð er undir 1000kr/m^2.

Það er jákvæð þróun fyrir leigumarkaðinn. Hinsvegar er slæmt að fólk er sífellt að fara fram á verðtryggða leigusamninga. Þvílík vitleysa! Húsnæði er sjaldan keypt á jöfnum greiðslum heldur jöfnum afborgunum. Það þýðir að þrátt fyrir X% verðbólgu á ákveðnum tíma, þá hækka afborganir á mánuði ekki um X%. Hinsvegar hækkar leiguverð um þessi X% á mánuði í takt við verðbólguna (vísitala til verðtryggingar).

Þetta þýðir t.a.m að ef verðbólga verður 20% á nokkra mánaða tímabili og leigt er í upphafi á 100.000 kr á mánuði, þá er leigan komin í 120þ á mánuði eftir verðbólgukúrfinn. Á sama tíma hafa flest önnur rekstrartengd útgjöld hækkað um sömu upphæð, þ.e.a.s matur, olía og annað slíkt sem VNV mælir. En að öllum líkindum hafa laun ekki hækkað. Það tekur töluvert lengri tíma fyrir þau að gera það.

Svo, greiðslugeta leigjenda hækkar ekki í verðbólgu, hún minnkar ef eitthvað er. Með augljóslega síauknu framboði af íbúðum á leigumarkaði þýðir þetta að það er betra að bíða með að leigja því verðmiði á leiguhúsnæði mun EKKI hækka í takt við verðbólgu. Það þýðir, að fólk sem leigir núna út íbúðir með verðtryggðum leigusamningum mun horfa upp á þeim vera sagt upp reglulega því leigjendurnir færa sig yfir í sambærilegri eða betri íbúð sem kostar töluvert minna að leigja per mánuð.

Ég skora á leigusala að hætta þessu verðtryggingarrugli á leigusamningum og bjóða frekar upp á óverðtryggða fasta leigu með endurskoðunarákvæði leiguverðs á x mánaða fresti eða efri mörkum á mögulegri hækkun leigu m.t.t verðbólgu.

Nokkrar góðar tilvitnanir

2008-11-16T14:14:00.002Z

Frederic Bastiat, The Law

When plunder becomes a way of life for a group of men living together in society, they create for themselves in the course of time a legal system that authorizes it and a moral code that glorifies it.

John Maynard Keynes

Lenin is said to have declared that the best way to destroy the Capitalist System was to debauch the currency. By a continuing process of inflation, governments can confiscate, secretly and unobserved, an important part of the wealth of their citizens. [...] Lenin was certainly right. There is no subtler, no surer means of overturning the existing basis of society than to debauch the currency. The process engages all the hidden forces of economic law on the side of destruction, and does it in a manner which not one man in a million is able to diagnose.

Voltaire

Paper money eventually returns to its intrinsic value ---- zero.

James A. Garfield

Whoever controls the volume of money in any country is absolute master of all industry and commerce.

Ron Paul

A system of capitalism presumes sound money, not fiat money manipulated by a central bank. Capitalism cherishes voluntary contracts and interest rates that are determined by savings, not credit creation by a central bank.

Myndir frá Mótmælum

2008-11-15T19:35:00.006Z

Evrópufánanum var flaggað en þetta var ekki eini fáninn á svæðinu!

Jón fylgist með öllu saman og grætur það eflaust að sjá sífellt dönsku krúnuna á Alþingishúsinu.

Löggurnar tóku því rólega og sem betur fer, annars hefði allt farið úr böndunum býst ég við.

Björn fylgdist líka með í fjarska.

Ekki hræddar við að láta skoðun sína í ljós þessar og flottar á því!

Hinn ESB fáninn sem ég sá, og flott krónuskilti þar sem þorskurinn var rotaður og honum blæddi.

Í kirkjunni var að hefjast brúðkaup. Einhverjum þótti sniðugt að prenta auglýsingar frá Sjálfstæðisflokknum og nota sem mótmælaskilti, enda nokkuð fyndið að hugsa til þess, að þegar öllu er á botninn hvolft, þá er traust efnahagsstjórn öflugasta velferðarkerfið! Já, takk fyrir það Geir!

Yfirlýsing um að Ísland sé ríki ei-meir.

Í lokinn fór fólk að ruglast á húsum og kastaði í Alþingishúsið því sem betur ætti að fara í Stjórnarráðið. Svosem skiljanlegt að fólk ruglist þegar að framkvæmdarvaldið hefur nauðgað löggjafarvaldinu áratugum saman og enginn alvöru aðskilnaður er þar á milli hérna á Íslandi.

Táknrænt. Held samt að þessi sé full lítill fyrir hálsinn á sumum enda fitna menn í góðæri.

Víkingasveitinni leiddist svo í hvíta bílnum sínum. Þeir hefðu haft gaman að því að rúnta um á þessum á Pjentedamsgade í Odense! Ætli ég hafi ekki veitt þeim ákveðna afþreyingu með að koma og smella af þeim einni mynd á símann.

Afnám verðtryggingar - Einfalt mál

2008-11-15T19:01:00.003Z

Þegar verðbólga mælist í kringum 2.5% þá ætti einfaldleg að breyta öllum verðtryggðum samningum þannig að þeir verða ekki lengur verðtryggðir heldur bætist við þá vaxtaprósentu sem á þeim er 2.5 til 4.0% vaxtaálag. Á sama tíma fer öll bindiskylda af verðtryggðum inn- og útlánum.

Frá þeim tíma geta lífeyrissjóðirnir einfaldlega tekið meiri stöðu í gulli eða erlendum gjaldmiðlum til verðtryggingar.

En svo kemur Evran auðvitað og þetta hættir að skipta máli.

Verðbólgustuð

2008-11-12T23:18:00.005Z

Var á áhugaverðum fundi um verðbólgu og verðtryggingu hjá Samfylkingarfélagi Reykjavíkur. Ég mælti þar fyrir því að stytta bindiskyldu verðtryggðra innlánsreikninga. Ég talaði um það að það væri til ungt fólk sem hefði haldist lengur inn á foreldrum og í leiguhúsnæði en það hefði viljað til að spara og vegna þess að fyrir því var þetta hrun fyrirsjáanlegt. Það fólk, og ég, á pening sem verður varla í umferð næstu 3 ár vegna bindiskyldu.

Það voru margir að væla yfir hækkandi verði á fasteignum sínum. Ég skil vel að það sé vont að skulda meira en maður á og ég er nokkuð ánægður með tillögur Gylfa um aðferðir til að minnka áhrif af hækkandi afborgunum á þá sem skulda. Hinsvegar er ég ekki til í það að fara að borga niður skuldir annara sem fóru og nutu frelsis við að kaupa íbúð á minn reikning meðan ég hírðist meira í foreldrahúsum en ég hafði hug á og geri enn sem stendur vegna ömurlegra aðstæðna á fasteigna og leigumarkaði! Ef það á að minnka mína eign í verðtryggðum reikningum þá er ég mögulega til í að missa áunna vexti yfir ákveðið tímabil, en ekki verðbætur, GEGN ÞVÍ að bindiskylda reikninga minna verði stórkostlega minnkuð eða jafnvel afnumin! Já, ég vil njóta góðs af því að hafa forðast óþarfa áhættu og geta því keypt fasteign á eðlilegu verði sem ég get svo greitt hratt og örugglega niður með jöfnum afborgunum en ekki jöfnum greiðslum á innan við 25 árum.

Til þessa á fundinum sem talaði um hvað tengdamamma væri nú góð, éttu það sem úti frýs. Þú vonandi skilur inntak þess sem ég mælti fyrir núna og áttar þig á því hversu ömurlegur svona skítahúmor er. Ég skynjaði aðeins á mér þarna á fundinum hroka gagnvart ungu fólki því við hefðum ekki lifað svona skítaaðstæður áður sem fullorðnir einstaklingar. Ég mæli vinsamlegast með því að fólk tali af reynslu við okkur sem yngri erum um hvernig þeim leið og hvernig þau komust í gegnum þá erfiðistíma af sem minnstum hroka og muni í senn hvernig þeim leið þegar verðbólgudraugurinn helltist yfir þau, þá sérstaklega í upphafi 9. áratugs síðustu aldar.

Samt sem áður góður fundur og áhugaverður. Komst einnig að því að fólk í áhrifastöðum hafði ekki hugsað út í áhrif verðtryggingar á húsaleigusamninga og þarmeð húsaleigumarkað. Meira um það seinna.

Hvað eru peningar?

2008-11-11T15:48:00.003Z

Í umræðunni undanfarið hefur mér fundist að hugtakið peningur hafi drukknað í tæknilegum útfærsluatriðum varðandi gjaldmiðla.
Gjaldmiðill er hugtak sem útvíkkar hugtakið peningur og gefur því eigindi varðandi t.a.m útgáfulögaðila og verðgildi gagnvart öðrum gjaldmiðlum.

En peningur er í sjálfu sér einfalt fyrirbæri. Peningur er í senn byggður á trausti, því án trausts mun ég ekki skipta við næsta mann á vöru og þjónustu í stað peninga sem hann hefur á sér eða á að geta verið góður og gjaldgengur fyrir. Peningur er einnig ávísun á erfiði annara einhverntímann í framtíðinni. Því eru peningar ávísun á skuldir þar sem skuldir eins eru peningar annars og við treystum peningunum fyrir því að gegna þessu hlutverki.

Það er ágætt að hafa þetta á hreinu þegar farið er að hugsa út í verðtrygginguna annars vegar, og svo milliríkjadeilurnar okkar við Breta og Hollendinga hinsvegar.

Varðandi milliríkjadeiluna þá má ekki gleymast að við erum í heljarinnar vandræðum vegna lítils traust. Á ábyrgð íslenskra fyrirtækja glataðist stórfenglegt magn af ávísunum á mikið erfiði erlendra aðila, sem þeir vilja nú að við borgum þeim þá til baka með að erfiða sjálf.

Varðandi verðtrygginguna þá fer traustið að skipta meira máli. Traust krefst ákveðinnar gagnkvæmni. Ég tek verðtryggt lán því ég treysti því að ytri aðstæður verði innan ákveðins ramma til að gera greitt mótaðila mínum lánið. Mótaðliinn gerir í raun sömu forsendu að því að veita lánið. Hann gerir sér vel grein fyrir því að ef ytri aðstæður (lesist: verðbólga) fer upp úr öllu valdi, þá er geta mín til að borga honum takmörkuð. Það þarf því að reikna traustið inn í verðtrygginguna og hafa ákveðinn efri mörk á vaxtahækkunum sem leggjast á höfuðstól vegna verðbólgu.

Báknið burt?

2008-11-01T22:35:00.004Z

Samkvæmt þessari frétt á Vísi hefur OECD reiknað það út að skattbyrði þjóðarinnar jókst úr 31.2% af GDP í 41.4% frá 1995 til ársins 2007. Ég veit ekki betur en að Flokkurinn hafi verið við völd og tögl allan tímann, með Fjármálaráðuneytið og Forsætisráðuneytið bróðurpart tímans.

Það er því frekar fyndið að þeir sem aðhyllast minnkun útþenslu ríkisins skuli hafa leitað í þennan flokk til þess að ná fram þeim markmiðum.

Hærri skattar eru réttlátanlegir ef þeir fara í aukna samfélagslega þjónustu og nauðsynlegan rekstur Ríkisins. Þeir eru það hinsvegar ekki fyrir útþenslu utanríkisráðuneytis, eftirlauna sérstakra opinbera starfsmanna eða til annara sérbitlinga.

Eru horfnu hlutabréf Birnu partur af stærra máli?

2008-10-31T02:15:00.005Z

Getur það verið að hlutabréfin sem nýr bankastjóri hins Nýja Glitnis, Birna Einarsdóttir, átti að hafa keypt í Glitni en á allt í einu ekki, tengist því sem Bankamaðurinn benti á hjá blogginu hans Egils?

Stemmir það að hún sé ein af fjölmörgum sem hafa fengið skuldir sínar afskrifaðar vegna hlutabréfakaupa í þeim banka sem það vann hjá, svo hægt sé að halda því í starfi?

Úr DV:

Viðskipti Birnu Einarsdóttur, bankastjóra Glitnis, með kaup á bréfum í Glitni 27. mars 2007 eru skráð í Kauphöll Íslands. Vilhjálmur Bjarnason segir að um leið og viðskipti hafi verið tilkynnt í Kauphöllinni taki menn á sig þær skuldbindingar sem fylgja. Birna hefur sagt frá því í fjölmiðlum að hlutur hennar í Glitni hafi horfið. Vilhjálmur segir þetta vera álíka tæknileg mistök og þjófnaður Árna Johnsen.

Birna hefur haldið því fram að mannleg mistök hafi leitt til þess að kaup hennar á bréfum í Glitni hafi ekki farið í gegn. Vilhjálmur segir að þegar viðskipti hafi verið tilkynnt í Kauphöll Íslands séu þau orðin raunveruleg og þá sé ekki hægt að bera við minnisleysi. Birna er núverandi bankastjóri Glitnis en hún keypti sjö milljón hluti í Glitni á genginu 26,4 fyrir samtals 184 milljónir króna. Engin sala á hlutum Birnu er skráð í Kauphöllinni. Vilhjálmur segir það alveg ljóst að bréfum Birnu hafi verið kippt út á bak við tjöldin. Það sé ekki hægt að bera við minnisleysi í svona málum.

Bankamaðurinn hjá Agli:

Smá saga af því sem er að gerast innan bankanna þriggja núna - staðfest frá fyrstu hendi þar sem ég er einn af þeim sem þetta á við. Finnst siðferðisleg skylda mín að láta vita af þessu.

Mikill fjöldi starfsmanna hefur keypt hlutabréf gegn láni (og þá helst erlendu) á undanförnum árum og jafnvel stuttu fyrir hrunið. Innan bankanna er unnið að því hörðum höndum að leysa úr þessari flækju og losa fólk undan þessari skuldbindingu - ástæðan er m.a. sú að starfsmenn sem tapa öllu og verða gjaldþrota mega ekki vinna hjá bankanum.

Hvaða sanngirni er þetta - ef losa á ákveðinn hóp undan skuldbindingum, afhverju á það ekki við alla. Þetta þarf að fá á hreint frá Björgvini G., formönnum skilanefnda og/eða núverandi bankastjórum.

Annað að fjölmargir framkvæmdastjórar seldu eitthvað að bréfum vikuna fyrir hrunið - FME hlýtur að rannsaka það og bakfæra slík viðskipti, við treystum þeim til þess (eða ekki!).

Vá, þetta er svakalegt. Bara rosalegt. Þessu þarf að svara á morgun, ef ekki í gær!

Ísland - Spilltasta Land í Heimi.

Eftirlaunafrumvarpið burt!

2008-10-30T17:29:00.003Z

Ef að eftirlaunafrumvarpið verður ekki afnumið og sendiherrum fækkað og dregið almennt úr eyðslu í utanríkisráðuneytinu þá mun ég ekki geta kosið Samfylkinguna og þar með engan flokk í næstu kosningum sem nú er á þingi.

Drífið í þessu og það strax!

Nýir tímar - Við mótmælum öll

2008-10-16T23:38:00.001Z

Nýir tímar - Við mótmælum öll

Posted using ShareThis

"Það eina sem hefur tapast eru peningar"

2008-10-15T23:48:00.002Z

Ég heyrði í kvöld fullyrðingu um að það eina sem hefði tapast væru peningar.

Þessu er ég ekki sammála.

Við höfum tapað framtíðarplönum okkar, fjárhagslegu öryggi, mannorði Íslands og trausti.
Við eigum á hættu að tapa samfélagslegum gildum með vaxandi atvinnuleysi. Við eigum í hættu að tapa lífum einstaklinga sem verða fyrir miklu áfalli. Við þessu þarf að bregðast og það fljótt. Sem betur fer er mikil áhersla á félagslega þáttin og á velferðarkerfið sem stóran part af viðbrögðunum við hruninu.

Ég heyrði góða hugmynd áðan. Hún var á þá leið að fólk gæti fengið að nota séreignarlífeyrissparnað sinn til þess að borga upp skuldir. Ég tel að þetta þurfi að vera leyft.

Ég ætla einnig að koma fram þeirri hugmynd að Alþingi breyti lögum um verðtryggingu tímabundið á þann hátt að fólk geti geymt peninga óbundna inn á verðtryggðum reikningum.
Þetta kemur til með að efla fasteignaviðskipti á næstu árum. Þá er fé laust hjá þeim sem eiga einhverja peninga en vilja verja verðgildi þeirra fram að fjárfestingu. Þetta minnkar líka flótta úr krónu yfir í erlendan gjaldeyri. Staðan er í dag er óþolandi, því núna þarf að binda lausafé í þrjú ár til þess að vernda verðgildi þess án áhættu.

Brennandi Spurning

2008-10-12T02:20:00.002Z

Við vinirnir hittumst áðan til að spila og spjalla líkt og mælt er með til að halda geðheilsunni á þessum tímum. Það kom upp í tali okkar að þessi vika hefur verið sannkölluð MEGAVIKA m.t.t þeirra atburða sem gerst hafa.

Þá kom á okkur hljóðan, afhverju er Dominos ekki með MEGAVIKU loks þegar um raunverulega megaviku er að ræða?!

I hope I'm not becoming a Conspiracy Theorist

2008-10-10T00:29:00.009Z

But perhaps I am? Please tell me that there is no valid point in the following.

Iceland is a country that only two weeks ago had a hugely leveraged banking system.
The debts were about 12 times the countries GDP. How this was allowed to happen without breaking it apart to suit the risk to the operations in each country isn't really understandable.
For instance, it is known that the central bank of Iceland was allowed to increase the reserve requirement of the banks, but it lowered it in the middle of our economic boom! Then went ahead and raised the interest rate on the krona, leading to a massive surge of foreign loans to both individuals and Icelandic corporations to avoid the interests of it's own currency.
That led to even more expansion, since all that foreign money loaned strengthened the krona and gave way to more imports.

Today we hardly have a banking system. And who is to blame? Looking far back, we have many culprits. But in the short term, it's our government and our central bank that failed. In a nation that is tiny, some 300.000+ people, connections are the key to power. And some have more power than others.

If you can short sell those formerly huge banks or make money of their CDS, then ensure that they fall under, just how much money can you make? Just how rich can you become? Even if you are just working with a powerful financial institution that gives you a small share of the profit and pay for the costs of short selling? (I assume it is impossible to do naked short selling in such tremendous amounts).

Kaupþing was among the world's largest corporations (in the top 1000 at a time). Landsbankinn and Glitnir weren't that much smaller. Why was the sequence of bad events that led to a total financial catastrophe triggered by denying Glitnir a mere 15 billion isk loan and instead promising to inject it with a 85 billion isk capital? When, 1 week later, Kaupthing was given a 500 million € bridge loan for 4 days, and fell 2 days before being able to pay it back! The trigger: Davíð Oddson made a blunder of biblical proportions on national TV. That blunder sparked an understandable reaction from the British authorities which lead to a technical default for Kaupþing.

So, 2 weeks ago, no betting was allowed with a 'mere' 15 billion isk to Glitnir and now all seems to be lost!

Why was the announcement about the loan from the Russians not made last week? Only a bit earlier and our financial system could have been saved! Why were so many mistakes made in the most crucial time frame? Why wasn't the sequence of events in a slightly different order? Why wasn't the interview with Davíð Oddson recorded and then carefully censored before being broadcast? Why did the Icelandic Government take this huge risk in allowing Davíð Oddson to speak publicly in live television at THE MOST critical time in our financial emergency? Knowing that he is NOT properly educated to be a central banker, that he is a politician with strong power over the longest ruling party of Iceland, and knowing that he likes to talk to 'his' fellow people as a politician!

I'm flabbergasted about the whole thing. Looking back at these two weeks, the only logical reason for this huge mess is that some Icelandic and foreign people are about to make a fortune of the whole mess at the expanse of the rest of us, the British, and other fellow European nations.

Please prove me wrong!

p.s Did I mention that JP Morgan was working closely with our government last weekend when they pretended to be planning a 'response package', only to say afterward that everything seemed OK and nothing was needed to be done right away?

Did I mention that the press conference on Wednesday was for some reason delayed from 11 am to 4 pm (Icelandic time), giving the British ample time to seize Icelandic companies operating in Britain?

Hopefully history will eventually show that it was all Lehman's fault and the subsequent total freezing of the credit markets that caused this.

Nokkrir punktar

2008-10-09T10:19:00.002Z

1. Stórt hagkerfi er forsenda beytingu hagfræðikenninga við stjórnun.
Íslenska örkrónan var og er of lítil til þess að vera á floti og vera stjórnað af veðrbólgumarkmiðum.
Það er aðeins kenning að stýrivextir hafi áhrif á verðbólgu. Undirstaða þeirrar kenningar er t.a.m að kerfið sé lokað. Það má nálgast með nægjanlega stóru hagkerfi þar sem tregður hafa áhrif á framgang mála. Íslenska hagkerfið var ekki nógu stórt. Það er augljóst. Að auki flækir tvöfalt myntkerfi á Íslandi, þ.e.a.s verðtryggða krónan og óverðtryggða krónan málið töluvert.

2. Spálíkön byggð á sögulegum gögnum spá aldrei fyrir um hluti sem hafa ekki gerst áður.
Þegar þú byggir á sögulegum gögnum til að taka inn breytur í t.a.m módel byggt á línulegri aðhvarfsgreiningu, þá ertu að gera ráð fyrir línulegum áhrifum byggðum eingöngu á þeim upplýsingum sem í gögnunum eru. Í síbreytilegu pólítísku og efnahagslegu kerfi samtímans þá eru endalausar ósamfellur í framtíðinni. Framtíðin er ólínuleg. Ef það besta sem fólk getur gert er að taka inn nýjar breytur eftir óvæntar uppákomur, þá erum við illa stödd með að meta framtíðina. Nota bene, það eru til mörg betri spálíkön en línuleg aðhvarfsgreining, en því miður kann fólk flest bara að nota hana. Þetta var atriði sem ég tók vel eftir þegar ég vann hjá Áhættustýringu Kaupþings. Fáir voru spenntir að prófa Random Forests, Naive Bays, Tauganet og önnur flottheiti, sem virka að ég tel, mun betur á fuzzy heim fjármála sem við búum í.

3. Áhættudreyfing eða samtenging áhættu?
Það er allveg augljóst að lánsfjárkreppan sýnir okkur að áhættudreyfing hefur ekki virkað. Í raun virðist þetta vera sambærilegt því að raðtengja fjöltengi og telja sig vera öruggan afþví að þú ert kominn með fleiri innstungur. Hinsvegar lá þetta allt á sömu greininni og féll því um leið og rafmagnið fór af. Það þarf að vera skýr stærðfræði í komandi lögum um eignarhald á bönkum sem tryggir að eignarhaldið sé ekki tengt net.

Kreppa hvað? Framleiðum Bíódísel í hverjum firði

2008-10-07T00:09:00.008Z

Jæja, ég ætla að skella fram hugmynd sem ég hef haft í maganum í nokkrun tíma.

Það er hægt að framleiða etanól úr þangi. T.a.m þá hafa Japanar verið að prófa það, Írar og Ítalir. (Sjá t.a.m http://www.forbes.com/afxnewslimited/feeds/afx/2008/10/01/afx5496120.html)

Mér er spurn: Afhverju að setja af stað olíuhreinsunarstöð á Vestfjörðum, þegar við gætum lagt allt Djúpið undir það að rækta okkar eigin bíódísil?

Við höfum ágætis þekkingu á því að sækja afla í hafið og vinna hann á landi. Við ættum að geta gert þetta. Þetta gæti líka haft jákvæð samlegðaráhrif við fiskeldi í sjó og mögulega myndi uppræktun á þangi haft jákvæð áhrif á stærð fiskistofna okkar vegna aukningu lífmassa í við strendur landsins.

Það er líka augljós kostur að notkun á þangi til að framleiða etanól gengur ekki á ræktanlegt land. Það er ekki einsog að við höfum of mikið af ræktanlegu landi hér á Íslandi. Hinsvegar höfum við töluvert mikið af strandlengju og fjörðum.

Mér þykir þetta svo rakið dæmi til að gera skör í kreppunni. Það er verið að rannsaka þetta framleiðsluferli út um allan heim og hægt að fá styrki í að koma þessu af stað. Svo þegar framleiðsla er farin þá getum við eflaust selt eitthvað af út fyrir gjaldeyri og gert landbúnað óháðan innflutning á erlendri olíu. Ísland væri þá að framleiða orku í flestum formum. Tala ekki um ef við finnum líka hefðbundna olíu á Drekasvæðinu.

Bíódísel, olíá raforka, vetni, metan-gas. Kreppa hvað?

Hvað verður um internetsaðgang okkar?

2008-10-06T18:02:00.003Z

Mig langar bara að impra á því að við erum í samningum við erlenda aðila varðandi gagnaflutninga upp að vissu marki. Mun verð á internettengingu stórhækka bráðlega?
Heimili og fyrirtæki þurfa á sinni internettengingu að halda.

Aðgangur að gagnasöfnum erlendis sem háskólar bjóða upp er nú orðinn ansi dýr.
Viðhald á rekstrarbúnaði mun verða dýrara.
Nýjir beinar, switchar, kaplar, netþjónar, uppfærslur á hugbúnaði og hugbúnaðarleyfum kostar sitt og mun hækka í verði. Þetta er stór pakki.

Öll kerfi okkar ganga á þessu.

Mögulega mun þó gengisfallið koma sér að góðu fyrir alvöru hugbúnaðargerð á Íslandi.
Ég áætla að flestir starfi í dag við IT stöf, en ekki SE/CS störf sem eru SE/CS menntaðir.

Reikningsdæmi Geirs?

2008-10-06T00:00:00.001Z

Seðlabanki: 500 milljarðar
Lánalína sem hann vill ekki viðurkenna: 500 milljarðar
Sala eigna banka erlendis: 600 milljarðar

Samtals
1600 milljarðar í gjaldeyri.

Var það ekki c.a talan sem átti að duga?

Bara verst að það er brunaútsala í dag.

Verkefni helgarinnar

2008-09-15T13:05:00.002Z

Ég er með JVC upptökuvélina hans Pabba í láni og því hef ég verið að taka upp töluvert upp á video. Ég ákvað einnig að taka fartölvuna mína í sundur til að þrífa úr henni ryk og skít og setja betra kælikrem milli örgjörvans og kælikerfisins.

Nú, upptökurvél + svoleiðis verkefni þýðir auðvitað að þið getið þá séð þetta:

Rétturinn til að ferðast á vegum landsins

2008-09-04T21:47:00.002Z

Ég stórlega mæli með þessari grein. Það er sjálfsagt mál að fólk hafi rétt til þess að ferðast á allan máta á þeim vegum sem til eru á landinu. Ef vegir eru eingöngu gerðir fyrir bíla og önnur vélknúinn ökutæki þá hafa ekki allir sama rétt til að komast á milli staða. Einnig er þessi réttur mikilvægur til þess að tryggja að á landinu geti verið sjálfbærar samgöngur, þ.e.a.s, Íslendingar geti komist staða á milli þótt enginn olía sé á landinu, samgöngur sem krefjast ekki utanaðkomandi innflutnings og orkuöflunar til að hægt sé að komast á milli staða.

Smá memo til Skeljungar Hf (Shell)

2008-09-03T19:47:00.002Z

Sæt auglýsing með litlum börnum að ýta leikfangabíl þvers og kurs í ægurfagri íslenskri nátturu fær mig EKKI til að kaupa meira bensín frá ykkur. Eða kaupa bensín frá ykkur yfir höfuð. Hér er smá hugmynd: Spara markaðsetningarkostnað og lækka álögur í staðinn! Það þekkja allir vörumerkin Shell, Olís, N1 (Esso), Atlantsolíu, Orkuna, Egó o.s.fv.. Það sem skiptir máli er verðið á dælunni!

Leiðið verðlækkanir og kúnnarnir koma.

Google Chrome

2008-09-03T00:36:00.003Z

Google Chrome er hraður og flottur vefrápari. Það má nálgast hann hér.
Chrome er reyndar RUGL hraður. Google höfðu fyrir því að láta Dani gera nýja javascript vél sem keyrir ofan á eigin keyrsluumhverfi og er kóðinn þýddur yfir í binary sem er svo lesið af vélinni. Hver einasti tab er í sér process og því notar þessi browser mun betur vélbúnaðinn á tölvunni en hingað til hefur verið gert.
Annars algjör snilldarhugmynd að nota teiknimyndasögu til að lýsa fídusum hugbúnaðar.
Flottur fídus að hafa incognito mode en þá vistast ekki vefrápið í vefrápssögunni.
Hinsvegar verður Chrome ekki minn aðalbrowser fyrr en Adblock er komið fyrir hann því ég þoli ekki vefauglýsingar út um allar trissur! Einnig vantar að geta sett lykilorð á browserinn svo að vefrápssagan, vistuð lykilorð og þessháttar eru ekki aðgengileg þeim sem fær að komast á netið hjá manni. Ég hef lykilorð á Firefox svo að enginn getur viljandi eða óvart farið t.a.m inn á gmail og aðrar síður hjá mér, og þá eru viðkomandi heldur ekki óvart að vista þeirra persónuupplýsingar á minn profíl.

Svo er mjög áhugavert að skoða EULA á Google Chrome:

11. Content license from you

11.1 You retain copyright and any other rights you already hold in Content which you submit, post or display on or through, the Services. By submitting, posting or displaying the content you give Google a perpetual, irrevocable, worldwide, royalty-free, and non-exclusive license to reproduce, adapt, modify, translate, publish, publicly perform, publicly display and distribute any Content which you submit, post or display on or through, the Services. This license is for the sole purpose of enabling Google to display, distribute and promote the Services and may be revoked for certain Services as defined in the Additional Terms of those Services.

11.2 You agree that this license includes a right for Google to make such Content available to other companies, organizations or individuals with whom Google has relationships for the provision of syndicated services, and to use such Content in connection with the provision of those services.

11.3 You understand that Google, in performing the required technical steps to provide the Services to our users, may (a) transmit or distribute your Content over various public networks and in various media; and (b) make such changes to your Content as are necessary to conform and adapt that Content to the technical requirements of connecting networks, devices, services or media. You agree that this license shall permit Google to take these actions.

11.4 You confirm and warrant to Google that you have all the rights, power and authority necessary to grant the above license.

Sæll!

Regnbuxur

2008-08-28T20:11:00.005Z

Ein af kennisetningum hagfræðinnar segir að kaupandi taki ávalt upplýsta ákvörðun um að kaupa ákveðna vöru m.t.t gæða, verðs og annara þátta. Þetta á að leiða til samkeppni um verð og þjónustu og orsaka stöðugt og gott verðlag.

Fæstir íslendingar myndu nú falla undir það að vera 'rational buyer's en ég er eflaust enn af þeim mest rational. Þannig er málum háttað að ég hef eytt amk 10 klukkustundum undanfarnar vikur í að finna mér regnbuxur. Ég hafði ákveðnar kröfur um gæði, ég þurfti að geta hjólað í þeim þannig að þær máttu ekki vera of þungar, síðar eða víðar. Ég þurfti að geta gengið upp á fjöll í þeim svo þær þurfti að vera alvöru regnheldar og nógu víðar fyrir þessháttar atferli. Síðast en ekki síst máttu þær alls ekki vera of dýrar.

Eftir að hafa farið í Markið, Örninn, G.Á.P, Everest, Intersport, Útilíf, Cintamani búðina á Laugaveginum, útsölumarkað 66°N, útsölumarkað Cintamani í Hafnarfirði og Regatta búðina þá voru mér allar bjargir bannaðar. Hvergi fann ég regnbuxur sem uppfylltu gæðakröfur mínar nema of fjandi dýrar, eða of síðar, eða eitthvað annað sem ég gat bara ekki sætt mig við. Nema í dag, þá loksins fann ég regnbuxurnar mínar í Hjólaspretti í Hafnarfirði! Eftir afbragðs þjónustu við umleitanir mínar varðandi hjól handa Láru ákvað ég að spyrja verslunarmanninn út í regnbuxur. Þá kom í ljós að hann var umboðsaðili Agu á Íslandi, en ég hafði séð þannig buxur í Erninum, en bara ekki eins flottar. Ég lét hann vita af þessu og bætti því við að í útsölunni hjá Erninum væri 35% afsláttur sem er nú satt og rétt. Hann sá að ég var svona ekki allveg að fara að kaupa buxurnar fínu á 8.900 kr, hafandi imprað á nísku minni og veru minni í Danmörku undanfarið ár, svo hann lét mig fá 30% afslátt og innsiglaði kaupin.

Ég er hæstánægður með buxurnar og mun ég eflaust sjást vel í þeim hjólandi í grenjandi rigningu næstu mánuðina, en ánægðust er Lára með að þessum kaupum mínum sé loksins lokið. Hversu mikið ætli allur þessi tími hafi í raun kostað mig? Ég held að ég og mín regnbuxnakaup sé rakið dæmi til að sína fram á hversu fráleit og dýr þessi kennisetning er.

Ný færsla

2008-08-21T14:25:00.001Z

Eða hvað?

Heimkoma

2008-07-18T12:32:00.003Z

Núna er útiveran liðin í Óðinsvéum og ég og Lára komum heim í kvöld.
Það er margt að frétta og mun ég skrifa lítinn pistil um það hér þegar að öllu stússinu í kringum það að flytjast búferlum er lokið.

Sjáumst á klakanum, og þið sem eftir verða, verður gaman að hitta ykkur næst og takk kærlega fyrir samveruna úti!

Endurkoma vinddrifna vöruskipa - Lækkum flutningskostnað til Íslands

2008-06-05T11:44:00.003Z

Ég var að velta því upp fyrir mér hvort einhver þróun væri í gangi með að nýta vindinn á ný til að koma vörum á milli landa. Það er allveg augljóst að hækkandi ólíuverð mun stórhækka flutningskostnað. Fyrir Ísland er þetta sérstaklega slæmt því við þurfum jú að flytja mikið af okkar nauðsynjavörum inn með skipum og svo tökum við Bananalýðveldið á þetta með að reikna flutningsgjöld inn í toll og vask.

Ég rakst á vefinn KiteShip og þar eru menn þegar farnir að nota segl á nýstárlegan máta til þess að draga úr olíubrennslu á hefðbundnum flutningaskipum.

Eimskip og Samskip ættu að athuga þetta! Þetta virðist vera auðveld aðferð til að draga úr ólíubrennslu 10-40% og væri ágætis brú þar til þessi skip verða drifin af öðru en olíu.

Nýtt lag - Volatility

2008-05-22T15:44:00.004Z

Þá hef ég ákveðið að hætta að láta þetta lag gerjast og setja það út á netið.
Einsog Anu Kirk rálagði mér eitt sinn, það er mun skynsamlegra að láta tónlistina heyrast og gera svo söngútgáfur seinna meir í stað þess að láta lagið aldrei út.

Þetta lag er taktfast og melódískt einsog ég hef þau flest. Ég er ansi ánægður með afurðina. Titilinn vísar í senn til núverandi efnahagsástand í heiminum sem og hvernig lagið breytist er á líður. Lagið er aðgengilegt hér í Last.FM flipanum til hliðar, og á last.fm síðunni sem og á heimasíðu Chill Productions

Njótið.

7. Maí

2008-05-07T22:12:00.004Z

Allveg frábær afmælisdagur í frábæru veðri. Var vakinn hálf átta þegar vinapar okkar kom í heimsókn og við höfðum afmælismorgunkaffi að dönskum sið.

Svo bakaði ég einn og óstuddur mína fyrstu súkkulaðiköku sem heppnaðist frábærlega.

Fórum svo út að borða á kaffihúsi og heim aftur í kósíheitin.

Algjörlega frábært dagur. (Tók líka ágætis æfingu þarna inn á milli sem og pússaði upp eldhúsborðið).

Í sólinni

2008-05-05T19:54:00.002Z

Það er naumast munurinn á veðrinu hér úti og heima.

Þegar ég kom heim í 12 daga í apríl þá tók rokið, gula grasið og rykið við mér.
Síðan fékk ég reyndar ansi gott veður og á Vestfjörðum var ennþá snjór í fjöllum, en sólin skein og vindur var fjarlægt hugtak svo fánarnir blöktu varla á Flateyri.

En, hér er 20°C og lítill vindur og mun veðrið aðeins "batna" með komandi dögum.
Hvað er ég að spá að fara að flytja aftur heim til Íslands þegar Danmörk er byrjuð að sýna sína bestu hlið.

Annars er það helst að frétta að ég skellti mér á hluthafafund Royal Unibrew í síðustu viku með dönskum hópvinnufélaga mínum. Hér eiga margir Danir bara örfá hlutabréf í fyrirtækjum sem hafa opinn hluthafafund og bjóða svo upp á ókeypis (og ótakmarkað) magn af bjór og mat eftir fundinn. Það var áhugaverð upplifun, danskt fyllerí frá 5 til 8:30 á þriðjudagskvöldi.

Annars fékk ég einhverja sumarflensu og það er frekar spes að fara út í góða veðrið með sumarflensu og líða betur. Maður er auðvitað ennþá gjörsamlega forritaður á íslenskar aðstæður, þar sem rúmið, sjónvarpið, opni glugginn og ofninn í botni er lykilatriði við að ná sér upp úr flensu, ekki göngutúr í góða veðrinu og svona einsog einn bjór.

Á morgun ætla ég út í garð og klára að lesa bókina sem Helgi lánaði mér, Fooled By Randomness, mikið langar mér að kaupa 63 eintök af þessari bók og gefa öllum þingmönnum Íslands.

Fór í bókasafnið í dag til að ná í bækurnar sem ég mun lesa á eftir þessari:
The Open Society and Its Enemies eftir Karl. R. Popper og Irrational Exuberance eftir Robert J. Shiller

Lágkúra Forseta Alþingis

2008-04-24T20:09:00.003Z

Mér þótti það ansi lágkúrulegt hjá Forseta Alþingis þegar hann notfærði sér afhendingu verðlauna í nafni Jóns heitins Sigurðssonar til að bendla skoðanir sínar um ESB umræðu á landinu í þá veru að Jón hefði verið mótfallinn ESB ef hann væri upp núna.

Blogg?

2008-04-22T11:56:00.002Z

Eins og ég byrjaði árið vel, þá hefur bloggtíðni mín gjörsamlega hrapað þrátt fyrir atburðaríka mánuði.

Annars, þá er ég staddur á Íslandi til 27. apríl en þá fer ég aftur út til Danmerkur
og líklegast kem ég aftur á klakann í Júlí.

Fækkun Tollvarða

2008-03-11T23:11:00.003Z

Það er leiðinlegt ef 20 manns koma til með að missa vinnuna. Hinsvegar er fínt ef hið opinbera byrjar að skera niður rekstur en ekki bara þjónustu til sparnaðar.

Þá getur Tollurinn farið að hætta hobbíverkefnum einsog að vigta nammi og telja bjórdósir og farið að einbeita sér fyrst og fremst að fíkniefnainnflutningi og mannsali.

Cyborg Love Songs

2008-03-01T15:27:00.002Z

Félagi minn og San Francisco búinn, Anu Kirk, bjó til smáskífu í Febrúar síðastliðnum sem part af keppninni RPM Challenge 2008. Heitir skífan Cyborg Love Songs og er bara þrusugóð hlustun. Það má nálgast hana frítt á http://www.chillproductions.com/.
Þetta er mjög í stíl við Depache Mode og af miklum gæðum.

Adaptive Robotics

2008-02-21T14:46:00.002Z

Hér að neðan er video af því hvernig vélmennið okkar fylgir línu og forðast hluti sem eru í vegi þess meðan það klárar að fara einn hring á þar tilgerðri braut.

Þetta var fyrsta æfingin í Adaptive Robotics. Við forrituðum hegðunina í Java og notuðum aðeins 1 ljósskynjara til að finna svörtu línuna. Fjarlægðarmælirinn sér hvort að það séu hlutir nálægt eða ekki og hann er ofan á þríhjólinu sem hreyfist ávalt í þá stefnu sem við erum við það að fara í. Til þess að útfæra þetta verkefni notuðum við 3 hegðunarmynstur, fara áfram, finna línu og forðast hluti.

Næst á dagskrá er að búa til róbotta sem getur spilað fótbolta. Til þess munum við þróa nokkur hegðunarmynstur með genetískum algrímum, líklegast munum við á endanum hafa þróað tauganet fyrir hverja hegðun, en tauganetið mun tengja skynjara við mótorana. Síðan ákveðum við hvaða hegðunarmynstur eru mikilvægust og hvaða mynstur getur þannig bælt niður önnur hegðunarmynstur. Markmiðið er svo að vinna fótboltakeppnina en það eru c.a 8 hópar í þessum kúrs og ætlum við okkur að rústa hinum 7.

Yfirlit yfir forsetaframbjóðendakosningar Demókrata

2008-02-11T22:36:00.000Z

The New York Times hefur eflaust það besta yfirlit sem ég hef séð yfir hvernig Demókratar fara að því að útnefna sinn forsetaframbjóðenda eftir fylkum og tímalínu.

Hér má nálgast yfirlitið.

Frábært veður

2008-02-08T12:54:00.000Z

Gærdagurinn leit einhvernmegin svona út:

Facebook

2008-02-07T17:32:00.000Z

Þetta er snilld

Ég er uppseldur á Wal-Mart

2008-02-06T20:53:00.000Z

Þetta er eiginlega bara fyndið:

http://www.walmart.com/catalog/product.gsp?product_id=5053668

Nvidia Threaded Optimizations

2008-02-05T13:38:00.001Z

This is perhaps a bit out of the theme of my blog, but it's as good a place as any to put it.

If you are experiencing Memory Parity Errors and you have a dual core / multi core computer and a NVIDIA graphics card, check and see if you have threaded optimizations enabled in the NVIDIA Control Panel. If so, disable them and see if the problem won't vanish.

Cloverfield

2008-02-02T00:29:00.000Z

Ég fór ásamt Láru, Bjögga og Andrzej á frumsýninguna á Cloverfield hérna í Danmörku.
Við sátum fremst af öllum í salnum fyrir miðju.
Mér fannst myndin góð, mjög góð, ákveðin bíóupplifun.

Lára varð hinsvegar aðeins sjóveik af að glápa á ræmuna.

En ég mæli með henni, myndinni.

Update

2008-02-01T14:02:00.001Z

Veikur, 5 dagar.
Hress, 2 dagar.
Illa brunninn eftir ljós, 5 dagar.

Annars er allt gott að frétta.

Strákarnir Okkar

2008-01-23T20:43:00.000Z

Strákarnir Okkar hafa svo sannarlega endurheimt sjálfsvirðinguna, virðingu okkar og annara eftir leikinn í kvöld!

Frábær frammistaða!

Við sjáum myndir

2008-01-18T16:03:00.001Z

Hvenær hrundi tölvan hans Jóa og tókst honum að koma hlutum í lag í tæka tíð
til þess að skila ritgerðinni, svefnlaus, klukkan 9 að morgni?

Þurfti hann að hjóla töluverðan spotta til þess að gera það?

Hefur Jói pantað sér nýjan harðan disk, ef já, tilgreinið týpu?

Látum skólana byrja seinna

2008-01-14T19:47:00.000Z

Ég hef oft talað um það að það væri sniðugt að byrja skólanna seinna. Bæði myndi það draga stórlega úr umferð á morgnanna þannig að fólk kæmist fyrr til vinnu sem og myndi það auka gæði og eftirtekt í námi.

Hér er góð grein sem styður seinni púnktinn, en það ætti að vera nóg að skoða bílastæði við framhalds og háskóla landsins til að styðja þann fyrri.

Viðhald og þróun hugbúnaðar

2008-01-14T14:59:00.000Z

Þá er fyrsta 12. mín hérna í Danmörku komin í hús. Ég tók munnlegt próf með powerpoint fyrirlestri sem er algjörlega ný vídd í prófatöku fyrir mér. En það gekk svona glimrandi vel þrátt fyrir að ég byrjaði að búa til fyrirlesturinn í fluginu í gær frá Íslandi og kláraði hann svo nývaknaður í morgun.

Kannski það áhugaverðasta sem ég tek úr þessum kúrs eru skilgreiningar frá Lehman
um S, P og E hugbúnaðarkerfi og 8 lögmál hugbúnaðar áframþróunar (Software Evolution).

S kerfi: Vandamálið og umfang þess er þekkt og breytist ekki.
Þetta á við um flest reiknirit og almenna útreikninga, svosem að reikna út vexti,
ferðast um gröf, margfalda fylki, o.s.fv.
Hin sanna veröld tölvunarfræðinga.

P kerfi: Vandamálið er þekkt en erfitt eða illmögulegt að finna bestu lausn á því.
Hún getur fræðilega verið til en ómögulegt eða óraunsætt að útfæra hana.
Þekking á sviði vandamálsins getur aukist og orsakað breytingar á P kerfi. T.d
veðurspáarkerfi, gerfigreindarkerfi og ýmsar hermanir í eðlisfræði.

E kerfi: Vandamálið er síbreytilegt og mengi þess einnig. Á við um flestan
viðskiptahugbúnað, stýrikerfi og önnur upplýsingatæknikerfi. Hinn harði heimur
hugbúnaðarverkfræðinga þar sem hlutirnir leysast sjaldan endanlega.
Hægt er að taka hluti úr E kerfum og færa yfir í S kerfi. E-kerfi geta litið
út fyrir að vera vörur, en meðan eftirspurn er eftir kerfinu, þá er nauðsynlegt að
líta á það sem þjónustu.

Hér eru svo 8 "lögmál" Lehman's, á ensku sem stendur:

1. Continuing Change - A system must be continually adapted else they become progressively less satisfactory in use.
2. Increasing Complexity - As a system is evolved its complexity increases unless work is done to maintain or reduce it.
3. Self Regulation - Global system evolution processes are self regulating.
4. Conservation of Organizational Stability - Unless feedback mechanisms are appropriately adjusted, average effective global activity rate in an evolving system tends to remain constant over product lifetime.
5. Conservation of Familiarity - In general, the incremental growth and long term growth of systems tend to decline.
6. Continuing Growth - The functional capability of systems must be continually increased to maintain user satisfaction over the system lifetime.
7. Declining Quality - Unless rigorously adapted to take into account for changes in the operational environment, the quality of a system will appear to be declining.
8. Feedback System - Evolution processes are mult-level, multi-loop, multi-agent feedback systems.

Tengjum þetta aðeins við uppáhalds hype íslenskra fyrirtækja í dag, viðskiptagreind:

Að líta á Viðskiptargreind sem vöru sem hægt er að búa til og setja svo í rekstur, án endalausrar áframþróunar er merki um vanþekkingu og lélega stjórnun. Viðskiptagreind snýst um að taka gögn úr E kerfum og dæla þeim í vöruhús gagna eða Olap kubba og þessir ferlar þurfa stöðugt að þróast og vera viðhaldið í takt við E kerfin sem stöðugt eru að þróast, svo lengi sem þau eru í notkun í lifandi umhverfi.
Því þarf að líta á þá sem starfa við viðskiptargreind sem sérfræðinga í að veita ákveðna þjónustu.

EMI íhugar stöðvun fjármögununar á RIAA

2008-01-12T00:51:00.000Z

EMI, fjórði stærsti útgefandi tónlistar í heiminum er að íhuga það að stöðva fjármögnun til RIAA. Nýlega tók verðbréfasjóður yfir rekstur EMI og var EMI fyrst til að hætta útgáfu DRM varinnar tónlistar á netinu. Það má draga þá ályktun að sumir eru ekki svo vissir um viðskiptalegt gildi þess að stefna fyrrum og mögulega verðandi viðskiptavinum sínum í gríð og erg.
Heimild, Ars-Technica

Hugmynd að Nýju Ráðningarferli Ráðherra

2008-01-11T20:44:00.000Z

Nefnd sem hingað til hefur metið hæfni umsækjanda velur 1 til 3 hæfustu umsækjendur að sínu mati.

Ráðherra velur einn umsækjanda sem hann hefur augastað á.

Viðkomandi nöfn eru sett í pott.

Nafn er dregið úr pottinum að viðstöttum fréttamönnum, sá vann starfið í það skiptið.

Ómögulegt að deila um ráðninguna eftir á.

Nú, ef nefnd og ráðherra hafa valið sama umsækjanda, þá kemur hann tvisvar fyrir í pottinum og ætti að vera öruggur með starfið.

ASÍ Jafnan

2008-01-11T01:27:00.000Z

Finnum skattprósentu S og persónuafslátt P með þeim skorðum að:

A: Kostnaður breytinganna sé undir X milljónum króna fyrir Ríkið.

B: Manneskja með laun Y borgi sama skatt og áður eftir breytingar,
laun Y ættu að vera nálægt meðal mánaðarlaunum á Íslandi.

C: S skal hækka

D: P skal hækka nægjanlega til að B haldi og skattleysismörk hækki.

Líklegast verður S hærra en 35.72% og P töluvert hærra en núverandi upphæð, 34.034 kr á mánuði.

Jaðarskattsáhrif eru óþekkt.

Rök eru til með og á móti persónuafslætti og hækkun hans.

Dæmi, ef Y = 400.000 ikr / mánuði þá verður S = 41% og P = 55.154 ikr / mánuði
Ekki er gert ráð fyrir neinum greiðslum í lífeyrissjóði eða annað slíkt til einföldunar.
Þá væru skattleysismörk 134.522 ikr / mánuði
Manneskja með 550.000 isr / mánuði myndi borga 7.902 ikr / mánuði meira í skatt.

Hinsvegar fann ég ekki nægjanlega góð gögn á Hagstofunni til að reikna út Y og þar með X, og því eru þetta bara pælingar fyrir umræðuna um kjaramálin.

Kostur þess að breyta bara þessum 2 lykilbreytum eru að þær eru þegar studdar í núverandi skattakerfi. Útreikningar skatta breytast því ekki og því er enginn kostnaður við að breyta þeim, nema þá í illa gerðum hugbúnaði sem gerir ráð fyrir að S eða P sé fasti, og sá fasti er fastkóðaður.

Hvort skattkerfið eigi að nota til að jafna kjör fólks er svo annar handleggur sem má deila um. Það má koma með kenningu fyrir því að því hærri laun sem fólk hefur, því meiri líkur eru á því að það sé einnig að taka inn fjármagnstekjur og hafi jafnvel ehf vætt heimilisrekstur sinn. Gaman væri að hafa gögn til að rýna í hvort þessi kenning standist. Ef svo er, þá má segja að aukin skattbyrði af launatekjum hátekjufólks sé réttlætanleg. Mótrök eru þó mörg, t.a.m sú að þau áhrif myndu enn auka ehf væðingu hátekjufólks, svik undan skatti o.s.fv.

Kannski að einn flatur skattur á alla skattstofna sé bara málið?

Laugarvegurinn

2008-01-08T18:42:00.001Z

Er ekki bara hægt að flytja Laugaveginn neðan Hlemms og að Lækjargötu eins og hann leggur sig upp á Hólmsheiði með flugvellinum?

Losna þannig við tvo hræðilega hluti í einum vettvangi svo við getum haldið áfram að byggja hér upp borg sem gott er að búa í?

Ég skil ekki þá vinnu og pólítík sem fólk getur farið út í við að friða húshræ, nóg
er af öðrum þarfari málefnum til að takast á við.

Ef þessi friðunarárátta heldur svona sterkt áfram þá halda hús áfram að brenna, "óvart", á Laugaveginum, sem virðist vera eina leið húseigenda til að geta nýtt lóðir sínar á þessu svæði.

Flestar aðrar höfuðborgir hafa lent í miklum brunum sem hafa búið til tækifæri til endurskipulagningar, því miður kannski, hefur Laugarvegurinn aldrei brunnið almennilega til að losa okkur við þessa kofa og leyft þeim því að vera til það lengi að í hugum sumra hafa þeir sögulegt og tilfinningalegt gildi.

Genetísk algrími og tauganet

2008-01-07T08:35:00.001Z

Jæja, 6 daga vinnutörn lokið. Get loksins farið að sofa. Búinn að skila inn tveim LUDO spilurum, einn sem var gerður með að nota tauganet með "backwards error propagation" sem ég forritaði í java og kenndi flest trixin í þróuðu útgáfunni af LUDO og sá seinni var þróaður með genetískum algrímum þannig að hver kynslóð var hópur af tauganetum sem síðan pörðust og stökkbreyttust þar til að eitthvað tauganetið fór að geta virkað sem góður heili í LUDO spilara.

Ég ætla mér að hreinsa til í þessum java kóða og setja svo grunnkóðan hingað inn á bloggið fyrir þá sem hafa áhuga og frekari útskýringar fjótlega.

Hefði þetta lag átt erindi í Eurovision?

2008-01-05T03:43:00.000Z

Ekki það að ég hafi neitt sérstaklega mikinn áhuga á því að keppa, en forkeppni Eurovision er eflaust ein besta leiðin til að koma sér á framfæri.

Ég er nokkuð viss um að nýjasta lagið mitt hefði verið ágætis Eurovision lag ef ég hefði skellt í það söng og fengið slatta af liði til þess að dansa og þykjast spila á hljóðfærin sem engin eru.

Hvað finnst þér? Hér er lagið:

kjwise – To Forgive

Ná í lagið

Er ólöglegt að taka afrit af geisladiskinum sem þú keyptir yfir á tölvuna þína?

2008-01-03T00:37:00.001Z

Sjáið þessa fréttagrein!

Eru dreifendur tónlistar ekki endanlega að missa sig? Ekki aldargamall tónlistariðnaðurinn er að lögsækja sig út í horn endanlega með þessum aðferðum.
Frjáls tónlist er framtíðin, enda getur hver sem er með hæfileika samið og gefið út góða tónlist löglega. Og aðeins hér á Íslandi er önnur hver manneskja mjög tónlistarlega þenkjandi.

Bless bless, iðnaður sem ert háður stjórnun á dreifingu. Nú borgum við bara tónlistarmönnum beint fyrir, með að mæta á tónleikanna þeirra.

Vörugjöld - Hinn Séríslenzki Skattur!

2008-01-02T22:37:00.000Z

Hér er góð grein um vörugjöldin sem komu í stað tolla sem hurfu við inngöngu Íslands í EFTA.

Á ekki að fara að fella niður þetta kjaftæði, Björgvin og Árni?

Samantekt SA um vörugjöld

Takk fyrir árið 2007

2007-12-31T19:28:00.000Z

Þá er enn eitt árið að líða. Þetta ár var ágætlega viðburðarríkt. Ferðast víða, og stóð þar hæst ferðin til Ameríku í maí og svo flutningarnir til Danmerkur í ágúst.
Ég hætti hjá Kaupþingi og byrjaði á fullu við mastersgráðuna mína í hugbúnaðarverkfræði.

Ég vil þakka ykkur öllum fyrir árið og óska ykkar hamingjusömu og viðburðaríku komandi ári. Vonandi tekst mér að hitta á sem flesta á nýju ári áður en við Lára fljúgum út aftur þann 13. janúar.

Kominn heim á klakann

2007-12-28T14:53:00.000Z

Mikið er gott að komast í sund.

Mikið er gaman að sjá fjöll aftur!

Rosalega er það hressandi að sjá ofurlýsta borgina þar sem allar svalir og gluggar
eru marglitar, jafnvel á nóttunni.

Sem er tilbreyting frá sparneytni Dana þar sem slökkt er á jólaskreytingunum í miðbænum
um 10 á kvöldin!

Vona að ég nái að hitta alla sem eru mér kærir hér heima, það ætti að takast enda verð ég hér til 13. janúar.

Hér eru svo smá myndir frá jólunum í Danmörku og Jólatívólí í Köben.

Hvít Jól

2007-12-23T01:01:00.000Z

MSN: Clicktoforyou.com

2007-11-28T20:19:00.000Z

Mig langar bara að vara fólk við því að logga sig inn á http://www.clicktoforyou.com/ (http://www.blockdelete.com/). Þegar þú gerir það þá gefurðu einhverjum 3. aðila þitt notendanafn og lykilorð sem getur notað það á hvern þann veg sem honum sýnist.

Einnig spammarðu alla sem eru á MSN listanum þínum með þessari síðu.

Það er alltaf athugavert að loggga sig inn á síðu með notendanafni og lykilorði sem tilheyrir þjónustu sem er rekin af öðrum aðila á annari síðu. Þetta er algeng leið til þess að brjótast inn í kerfi og fá persónuupplýsingar fólks og því miður falla margir fyrir þessu.

Hugið einnig að því að margir, og líklegast nokkrir sem lesa þetta hér, hafa sama eða svipað notendanafn inn á flestar síður og nákvæmlega sama lykilorð! Og í pósthólfi flestra, hotmailinu, gmailinu, o.s.fv má svo auðveldlega finna út með sjálfvirkri leit, hvaða síður þú ert skráður á, hvað notendanafn þitt og lykilorð er á þeim og svo framvegis. Jafnvel kortanúmer og pin kóðar.

Hagsmunagæsla, þröngsýni, fasismi

2007-11-19T15:52:00.000Z

Síðan tónlistin mín fór á torrent þá hefur að meðaltali 3 náð í hana alla á hverjum degi. Það er nokkuð góð dreifing fyrir hobbítónlistarmann einsog mig.

Vinur minn setti torrentana á torrent.is og fóru hjá honum 7 eintök á c.a 2 dögum!
Ég get ekki annað sagt en að ég hafi hagsmuna að gæta að IsTorrent sé opin svo tónlist mín dreifist þar, mér í hag.

Hér eru fréttir um fasisman.
http://www.mbl.is/mm/frettir/frett.html?nid=1303730
http://www.mbl.is/mm/frettir/frett.html?nid=1303781

Hér er auðvitað verið að hengja bakara fyrir smið, og það sem verra er, sú stjórn sem var möguleg á hvaða torrentar voru mest í umferð á Íslandi mun nú verða að engu.

Það er lítið mál að opna tracker síðu bara fyrir íslenskar ip tölur á einhverjum erlendum vefþjóni.

Verst þykir mér að lögreglan sé orðin slíkt handabendi hagsmunaaðila að hún leyfir lögmanni viðkomandi aðila að koma með og svo gott sem stjórna aðgerðunum.

Að tapa sér í netinu

2007-11-14T23:23:00.001Z

Jæja, þá er einu af helstu hliðarmarkmiðum mínum við að flytja hingað út að rætast.
Ég er loksins farinn að stússast aftur í eigin verkefnum af sama krafti og þegar ég var 13-19 ára. Ég er allveg á því að þau ár kenndu mér einna mest í því hvernig ég gæti nýtt tölvuna sem mest í að gera eitthvað skapandi, búa til tónlist, vinna í heimasíðugerð og forrita.

Það er nefnilega rosalegur munur á frítíma sem ég hef hérna í náminu v.s ruglið í HÍ eða þegar maður var bara að vinna í KB og langaði ekkert að vera meira í tölvu þegar stimpilklukkan sagði "blíp".

Ég er semsagt búinn að uppfæra aðeins www.kjwise.com, setja upp sftp þjón á serverinn minn, eyða hellings tíma í þetta torrent dót og semja tónlist. Ofan á að elda mat, fara í skólann, vinna í skólaverkefnum og almennt að lifa í Danmörku og lyfta.

Já, svona á þetta að vera, nám þarf að gefa fólki nægjan tíma svo það geti verið skapandi á því sviði sem það er að sækja fræðin til, ekki bara í það eitt að taka við fræðunum.

Auðvitað finnst mér þetta sérstaklega vera atriði þegar það kemur að hugbúnaðargerð, því þar eru fræðin oft misgóðar hugmyndir sem á endanum verða háðar því að vera útfærðar sem verkfæri. Hver veit nema nemendur gætu komið með betri hugmyndir á því sviði ef þeir fengu nú bara tíma til þess.

Á þeim nótum þá er ég ekki svo viss um að mér lítist nógu vel á námskeiðavæðingu doktorsnáms í Evrópu. Mig langar bara að fá að helga mig mastersverkefninu, byrja svo í doktornum, kenna aðeins með honum en að öðru leiti vera helst á kafi í áhugaverðu og skapandi rannsóknarverkefni.

Þannig er nú það!

Þá hef ég dreift tónlist á torrent

2007-11-12T23:25:00.000Z

Líkt og sumir lesenda minna vita þá sem ég tónlist, en hef verið skömmustulega óvirkur við að setja nýja tónlist út síðustu ár. Nýjasta lagið mitt er Flown Away en ég er nú bara nokkuð stoltur af því, sem og restinni af mínu dóti.

Hinsvegar þarf maður að vera duglegur við að geta út nýtt efni og taka þátt í allskonar atburðum á netinu til að halda sér á floti. Þetta er sérstaklega mikilvægt eftir að mp3 tæknin tröllreið öllu og fólk bættist veldislega við á netið og dældi inn stolinni tónlist eftir þekkta höfunda á netið í stórum stíl.

Já, hlutirnir eru ekki jafn einfaldir og þeir voru fyrir árið 2000 á internetinu.

Hinsvegar ákvað ég að prófa svolítið nýtt: http://thepiratebay.org/tor/3886997
Já, ég hef sett tónlistina mína á Piratebay og Isohunt. Aðeins að bæta við í flóruna af löglega dreifðu efni á torrent.

Reyndar er House of the Rising sun, amen remixinu mínu greinilega þegar dreift á Isohunt, en það er bara töff.

Hvað um það, vonandi fer ég að finna tíma til að klára nokkur velflott lög (að mínu mati auðvitað) og setja þau út á netið, ásamt því að uppfæra heimasíðuna mína, og jafnvel skipta um listamannsnafn :)

Þetta er svo rétt

2007-11-12T16:52:00.000Z

Mér hefur oft hugnast að skrifa meira um hugbúnaðargerð á þessu bloggi. Reyndar held ég þó að ég ætti að stofna nýtt blogg fyrir það og halda þessu blöggi fyrir almennt dægurhjal og röfl.

Hinsvegar er ég vanalega svo sammála honum Joel að ég get bara allveg eins linkað á hann og sagt "lesið þetta".

Og hérna er grein sem þið ættuð að lesa, þetta er einfaldlega svo rétt. Og ágætis skot í lokinn á Scrum (sprett).

Punktablogg

2007-11-10T11:30:00.000Z

Helgina eftir ferðalagið kom systir hennar Láru í heimsókn með dóttur sinni.
Þá helgi var ég að læra fyrir fyrsta prófið mitt.
Ég varð fárveikur, fór til 2 lækna, lenti í blóðprufi sem var tekin úr þumalfingri,
fékk vottorð og mætti því ekki í fyrsta prófið mitt.

Á fimmtudeginum var mér farið að skána og þá tók ég próf í SSE01 og gekk vel.
Svo komu Pabbi og Sandra systir í heimsókn á fimmtudagskvöldið og ég var mættur upp á völl til að taka á móti þeim.
Til að undirstrika hvað Danmörk er einsog lítið Ísland, þá hitti ég þar gamla vinkonu úr Rimahverfi (Rimlahverfi) sem var að bíða einnig eftir að fólk kæmi úr hliðinu.
Tjáði hún mér að margir af gömlu villingunum eru búnir að koma sér fyrir í Köben og séu farnir að læra. Gott hjá þeim!

Það var gaman að hafa P&S í heimsókn. Okkur Láru tókst að drösla þeim nánast um allt í Odense, miðbæinn, skólann, Rosengard, Bíóið í járnbrautalestarstöðinni og dýragarðinn.

Brátt fer ég að enduropna FlickR aðganginn minn og hendi inn myndum af þessu öllu saman.

Svo fóru þau snemma á mánudagsmorgninum og ég fór í skólann í nýju blokkina sem ég er byrjaður í.

Í gær tók ég svo munnlega prófið í AI00, fyrsta prófið sem var ekki staðið / fallið.
Mér tókst að fá 10 á nýja skalanum, en það er svona svipað og 8.5-9 á þeim íslenska.

Svo er ég aftur orðinn veikur! Bévítans erlendu vírusar og bakteríur.

Flensborg - Amsterdam - Muenster

2007-10-26T09:12:00.000Z

Síðustu viku fór ég og Lára í smá ferðalag.

Ferðinni var heitið til Amsterdam frá Odense, svo til Muenster og aftur til baka.

Ekki byrjaði ferðin vel, lestirnar til Jótlands töfðust um 3 tíma vegna sjálfsmorðs á teinunum. Svo þegar við komum til Flensborgar til að ná í bílinn sem við höfðum pantað, þá var hann ekki til, en við fengum í staðinn flottan F klassa bíl, sem var því miður Bensín, og gerði það ferðina dýrari.

Þá keyrðum við af stað, sein á ferð og útlit fyrir að við myndum lítið getað notið kvöldins í Amsterdam þegar við loksins kæmumst þangað.
Við hringdum í gistihúsið sem við áttum pantað í og létum vita af seinkunn.

Nánast um leið og Lára var búin að hringja, þá lentum við í c.a 20km langri röð á Autobahninu, á vegi A1 vestur. Það tók okkur 1.5 klst að komast úr þeirri röð og þegar við keyrðum framhjá slysinu sem hafði orðið þar sáum við að enn var verið að draga bíla í burtu og heill her af mönnum var að sópa veginn.

En tja, við komumst til Amsterdam á endanum og okkur tókst að leggja bílnum og með hjálp borgarbúa að finna gistihúsið. Vorum aðeins 6 tímum á eftir áætlun., klukkan orðin 22:00.

Annars var fínt að vera í Amsterdam en ég mæli ekki með að fara þangað á bíl því það er fjandi dýrt að leggja þarna. Það er best að parkera í P+R húsum sem eru í kringum borgina og taka svo lestina inn eftir.

Við skoðuðum margt og mikið og ég tók Láru með mér á veitingarstaðinn Gauchos sem ég fór á með pabba og öðrum starfsfélugun hans hjá Björgun árið 2003. Tókst mér að gleyma VISA kortinu á staðnum og þurfti að láta loka því.

Svo fórum við 2 dögum seinna til Muenster og hittum þar vinapar okkar Jennu og Axel. Lára kynntist Jennu þegar hún var á Íslandi sem siptinemi í læknisfræði. Fór ég t.a.m með þeim upp á Esjuna á þeim tíma. Jenna er núna að læra barnalækninn í sérfræðinginum. Tóku þau vel á móti okkur. Muenster er flott lítil borg, en það sem ég rak augun helst í er að á einum af stærstu kirkjutununum þar má sjá 3 búr hangandi í loftinu. Voru 3 aðilar sem höfðu valdið upplausn í samfélaginu á 17 öld fangaði og látnir deyja drottni sínum í járnbúrunum. Hanga þau þar enn í dag (búrin), en lyktin vonda er löngu farin. Á kvöldin lýsa lítil ljós í búrunum.

Að lokum keyrðum við aftur til Flensborgar, fengum okkur að borða, náðum taxa til Padborg og tókum lestina heim til Óðinvéa. Í þetta skiptið án nokkura tafa.

Það er gaman að geta ferðast fluglaust um Evrópu :)
Autobahnið er sérstaklega skemmtilegt en ég keyrði á milli 120 km / klst til 200 km / klst eftir aðstæðum.

Lenti í því að vera á vinstri akrein og vera blikkaður til að víkja yfir þá hægri, en þá var ég að keyra á 190 km! Sá ekki hvort það var Benz eða Ferrari sem þeyttist fram úr okkur, svo hratt fór hann.

Að lokum má geta að ég er kominn aftur með VISA kortið, veitingarstaðurinn póstlagði það til mín. Núna þarf ég bara að fá bankann til þess að opna það aftur.

Svo mikið má nú segja um þetta ferðalag. Ójá.

REIkjavík - Spurningin sem ég hef ekki heyrt

2007-10-11T22:41:00.000Z

Ég hef verið að fylgjast með þessu REI máli héðan af Fjóni.
Mér líst nú ekkert voðalega vel á þennan samsuðning sem mun taka við völdum og því spyr ég:

Væri ekki vænlegast að halda nýjar kosningar í Reykjavík?

Hvað er ég að gera í SDU?

2007-10-09T18:04:00.001Z

Smá update á því hvað ég er nú eiginlega að gera hér í DK!

Núna allir kúrsar meira og minna hættir fyrirlestrum og ég er því að vinna með hópnum mínum í verkefnum tengdum kúrsunum.

AI00:
Eitt verkefnið er að gera A* lausnarforrit til að leysa Sokuban þrautir (þegar klárað og keyrir vel). Lausnin er svo sett á legoróbotta sem við höfum smíðað og forritað stjórnforrit sem les af ljósskynjurum og sendir skilaboð til mótoranna. Á morgun mun róbottinn svo keppa við aðra um að leysa þrautina. Róbottinn hefur þegar farið eftir lausninni á actual borði 4 sinnum án þess að klikka. Okkar vantar bara að auka hraðann og þá er sigurinn okkar. Reyndar erum við nokkuð sigurvissir þar sem fæstir aðrir hafa náð að gera lausnarforritið, hvað þá örugguan róbott.

ROB00:
Annað verkefnið er að klára að búa til leið í kartískum hnitum fyrir tvo iðnaðarróbotta í róbottahermi svo þeir geti flutt kassa frá A til B án árekstra.
Þetta hljómar kannski einfalt, en að velja hnitin er ekki trivíalt vandamál, því val þeirra, ásamt hraða og hröðun, og engum árekstrum, hefur áhrif á það hvaða stillingar verða á róbottunum í liða-rúmi (joint space). Þetta þarf svo að forrita allt saman í c++ ofan á RobWorks (http://www.robwork.dk) og fá til að virka.
Ég hef þegar leyst æfingarverkefnið fyrir þetta, og mun líklegast leysa þetta verkefni á komandi dögum. Reyndar langar mig rosalega til að fara að vinna aftur í C# 3d vélinni/leiknum sem við félagarnir í Leikir Group byrjuðum á þarsíðasta sumar, enda er ég kominn núna með enn meiri þekkingu til að útfæra það af gæðum.

SE00:
Þriðja verkefnið er svo kerfi sem notar Agenta (nú má einhver minna mig á íslenska heitið), svo að margir notendur geti selt og keypt af hverjum öðrum hluti af ákveðnu tagi í einhverju magni. Það flotta við þetta er að þú segir aðeins hámark kaupverðs eða lámark söluverðs og tíma sem salan skal gerast fyrir, og agentinn fer svo af stað úr þinni tölvu og flakkar á milli sölusvæða og reynir að díla sem best hann getur fyrir þig svo þú fáir sem mest fyrir þinn snúð. Svona agentar eru einmitt fyrir það gerðir að komast yfir þá þröskulda sem netsamskipti hafa, en ljósið fer jú aðeins ákveðið hratt og mikið suð yfir vírinn gerir öll kerfi á endanum hæg, sama hversu hraðar tölvurnar eru. Einnig geta svona kerfi þolað það þótt heilu tölvurnar í kerfinu hrynji samstundis ef gerðar eru réttar ráðstafanir til að viðhalda klónum af agentum í kerfum sem þeir hafa þegar heimsótt.

Já, ansi skemmtileg lína sem ég er á og margt sem má tvinna saman í mastersverkefni.
Reyndar freistar það mín að taka master úr bæði HÍ og SDU, semsagt að útskrifast úr báðum skólunum, M.S í hubúnaðarverkfræði og M.S í Datateknologi - AI.

Hún af ammli í dag

2007-10-09T17:52:00.000Z

Lára mín er 27. ára í dag. Til hamingju ástin :)

UltraSTAR - SingStar fyrir PC

2007-09-22T14:01:00.000Z

Forritið er hér.

Svo er málið að ná sér í góðan ultrastar lagapakka í gegnum BitTorrent.

Þetta svínvirkar allveghreint.

Wikipedia færlsa um forritið.

Internetið

2007-09-20T15:16:00.000Z

Ég ætlaði alltaf að segja frá netinu hérna í Danmörku.

Eftir að hafa skoðað tilboðin sem voru í gangi þá ákvað ég að slá til og fá 15 mbit niður og 1 mbit upp tengingu hjá TDC fyrir "kun" 399 dkr á mánuði.

Við biðum í 2 vikur eftir því að tæknimaðurinn kæmi og riggaði upp adsl línunni, og einhvernmeginn í skilmálunum það kostaði það okkur 459 dkr! En jæja, net er net.

Svo prófaði ég nú hraðann og þá fékk ég nú bara 3mbit niður og 0.5 mbit upp. Eftir smá pælingar þá fór ég á DSL Reports sem er síða sem ég hef notað síðan ég var tengdur múlastöð með adsl árið 2000.

Þar er hægt að prófa línuna og gera ákveðin test, ná í forritið Dr. TCP og nota það til að stilla netkortið fyrir tenginguna til að fá sem mest úr henni.

Eftir það þá er ég kominn nánast upp í 15mbit niður og nálægt 1mbit upp og ég er ánægður. Svona geta stillingaratriði í Windows komið í veg fyrir að maður fái þá þjónustu sem keypt hefur verið.

Ég mæli líka með að nota eftirfarandi trix til að hraða upp Firefox, einhverntímann áður hef ég notað þau en steingleymdi þeim, svo núna verða þau rituð í stein á blogginu enda munar um minna í hraða:

Skrifaðu about:config í address bar, þá ferðu á stillingarsíðuna á browsernum.

Filteraðu út allt dótið sem er þarna með að skrifa "pipelining".
Settu það sem er false yfir á true, og láttu MaxRequests = 30

Hægri smelltu svo fyrir neðan neðsu línuna og gerði New - Integer, láttu hann heita
nglayout.initialpaint.delay og gildið fyrir hann er 0.

Núna verður Firefox töluvert hraðari.

Mæli svo enn sem áður með að setja inn ADBLOCK til að losna við óþarfa auglýsingar sem hægja á vefrápinu hjá manni.

Lífið í Danmörku

2007-09-18T22:06:00.000Z

Ég ætlaði nú að vera duglegri við að blogga fyrstu dagana við komuna hingað en við vorum netlaus hér heima hjá okkur fyrstu 2 vikurnar og blogger vildi ekki hlýða mér á þráðlausa netinu niðrí skóla.

Sá frítími sem ég hef haft í tölvunni hefur svo verið meira og minna brúkaður af því að spila PES, en ég er farinn að hafa það á tilfinningunni að hún Lára mín sé að plotta eitthvað með að missa tölvuna mína óvart í vaskinn t.a.m svo ég spili nú ekki meira af þeim andskota.

Það tók okkur heljarinnar tíma að koma okkur fyrir, í íbúðinni var jú klósett, sturta, ískápur og eldavél og ágætis eldhúsinnréttingar, og svo veggir og gólf og þak, en ekkert annað. Enginn fataskápur t.a.m

Við vorum því fyrsta daginn að sækja dótið hennar Láru um alla Odense á bílaleigusendibíl sem ég keyrði um líkt og enginn væri morgundagurinn.
Svo fengum við hjálp margra góðra vina okkar hérna við að koma því inn og síðan reyndum við að kaupa það sem þurfti til viðbótar en það er ekkert grín hér í Odense að fá allt samdægurs.

Því fóru næstu dagarnir í það að versla.

Við versluðum 200kg eldhúsborð úr eik í BILKA og það var rosalega gaman að skrúfa saman þá 8 stóla sem fylgdu með, með handónýtu skrúfjárni.

Í heimsins minnsta IKEA, sem hefur lager á við meðalstóran bílskúr í mosfellsbæ, versluðum við meira en mig langar til að vita. Vitið þið að ef dótið er ekki til í lager þá kostar það auka 850kr danskar að fá það sent heim innan einnar viku, og ekki hægt að ná í það til þeirra!

En jú, við keyptum PAX skáp og innréttingar, borðstofuborð, og fullt af smáhlutum sem karlmenni á borð við mig man ekkert hverjir voru. Tók það c.a 1 dag að setja saman skápinn með hjálp MAN POWER borvélarinnar hans Bjögga.

Svo kom sófinn frá BOLIA sem ég elskaði að tuða yfir hversu dýr hann hefði verið, en elska núna að liggja upp í.

Nú, að setja upp gardínur er oft einfalt mál, en ekki hér í íbuð með 4 metra lofhæð og sérstakar gluggastærðir. Ég mæli ekki með að kaupa strimlagluggatjöld nema þú losnir við að stytta þau bæði á lóðrétt og láðrétt, því þetta reyndi töluvert á verkfræðikunnáttu mína sem og þolinmæði. Þar fór dagur af vinnu.

Að lokum kom svo rúmmetrinn minn frá eimskip og núna er ég kominn með góðu vinnuaðstöðuna mína sem ég hef tekið með mér frá ljósheimum, upp í mosó, niðrí hagamel, aftur upp í mosó og að lokum núna til Odense með viðkomu í skipi.

Allavegna, ég á nú eftir að taka myndir af íbúðinni, segja svolítið frá skólanum, klakamótinu, menningarnóttinni hér í borg, nágrannaerjum, staðnum sem ég er að lyfta á, kebak, danska kúrnum, internetinu og fleira, en þá ætti ég nú í hið minnsta að hafa frá nægu að segja á næstunni, enda hlýtur nú bloggsumarfrí mitt að vera á enda.

Kominn á völlinn

2007-08-27T14:56:00.000Z

Jæja, þá er ég í fríhöfninni að bíða eftir fluginu út.

Vonandi er einhver Dani með opið net nálægt staðnum sem við munum flytja á enda eigum við eftir að ganga frá öllum slíkum málum :)

Svo eru helgarnar að byrja að bókast upp varðandi heimsóknir, svo það er best að fara að bóka eina sem fyrst, enda allir hjartanlega velkomnir í heimsókn!

Síðasti starfsdagur

2007-08-10T15:11:00.000Z

Í dag er minn síðasti starfsdagur hjá Kaupthingi Banka og sést það vel á gengisfalli hans ásamt öðrum fjármálastofnunum að ég er að yfirgefa fjármálaheiminn, amk í bili ;)

Það hefur þær afleiðingar að ég er kominn aftur með gamla símanúmerið mitt, 663-2620 og mun það vera það númer sem ég nota þegar ég verð á klakanum.

Uglan Alvitra

2007-08-07T16:54:00.000Z

Ég ætlaði í Ugluna til þess að lagfæra skráningu í kringum mastersnámið hjá mér, og viti menn, hús vissi bara allt um málið!

Uppfærsla

2007-08-01T14:05:00.000Z

Þrátt fyrir arfalélega frammistöðu í bloggi undanfarna mánuði þá kíkir slatti hingað inn daglega.

Ég sé mér því ekki annað fært en að sparka aðeins í bloggið og henda inn á það einhverjum línum.

Verst er þó að bloggið mitt er partur af blogggáttinni. Því er það miður að ég skuli bara skrifa hér um mitt fábrotna líf í stað pistils um ágæti skattalækkana og hrun verðbréfamarkaðarins með tilheyrandi tilvitnunum í John Stuart Mill, Adam Smith og annara góðra manna.

Hvað um það.

Um helgina fór ég og Lára norður á Akureyri til að vera viðstödd brúðkaup Gauta og Valdísar. Var brúðkaupið flott og gaman að sjá loksins hvernig kirkjan lítur út að innan fyrir ofan tröppurnar margrómuðu.

Veislan var fín og maturinn með ágætum en þakklátur er ég fyrir að hafa fengið frábæra gistingu á góðum stað, enda veitti ekki af henni eftir átök næturinnar.

Annars hefur þetta sumar liðið hratt og vel.

Kvöldin hafa farið í afþreyingu, fótbolta, tónsmíðar og önnur góð verk. (PES6)
Við pössuðum hús í einar 2 vikur og höfum einnig farið á ættarmót norður á Vestfirði.

En kannski líður þettar sumar aðeins of hratt...

Núna er minna en mánuður í að ég flytji út til Danmerkur. Við erum þegar byrjuð að borga leigu af íbúðinni úti og sem betur fer hef ég fengið skriflega staðfestingu á að vera kominn í skólann.

Það er samt margt sem er eftir óklárað, minn síðasti vinnudagur er 10. ágúst og strax eftir þann dag þarf ég selja bílinn, taka allt mitt hafurtask saman og flytja út með skipi, fá staðfestingu því sem ég flyt út hjá tollinum svo ég borgi ekki af því aftur við að flytja inn, hjóla um hálendið og reyna að kasta kveðju á sem flesta.

En nær núinu er spurningin: "hvernig á maður að nota Verslunarmannahelgi þar sem konan er á vakt allar nætur?" að sækja á mig.

Svarið: Spila fótbolta, já, það er málið.

MSN blogg

2007-07-12T16:25:00.000Z

Jói says:
Ég ætla að drullast til þess að sameina allt þetta shit líka

Jói says:
bloggið, kjwise, facebook, flickr ...

gulli.is says:
Já, þetta er að verða svolítið yfirdrifið

Jói says:
það er ómögulegt að lifa á internetinu eiginlega

Jói says:
Eftir að mengi þeirra sem eru á netinu fór að covera flest öll stök samtímamanna okkar þá myndast allt í einu samfélagslegur þrýstingur til að taka þátt í svona félagsvefum sem var ekki til áður

gulli.is says:
Ef maður er ekki með þá er maður bara skrítinn

WORD er dautt!

2007-07-09T19:29:00.000Z

Hvernig hljómar að fá forrit sem er létt í keyrslu, mun betra en WORD í ritgerðir og skjalavinnslu, exportar yfir í PDF fullkomnlega og er frítt LÖGLEGA?

Vel? Já, prófaðu þá Creative Docs .NET!

Svo mæli ég líka mjög með Launchy sem gerir XP að ennþá betra stýrikerfi og Vista að enn meiri óþarfa. ALT + Space og þú rétt ritar inn fyrstu stafina á forritinu sem þú vilt ræsa, og viti menn, það ræsist.

Check it out

2007-06-27T00:18:00.000Z

http://www.avaaz.org/en/stop_the_clash

Darth Levi

2007-06-25T12:16:00.000Z

Darth Vader hjálmur + Bleyja úr handklæði og bláum borða keypt í Rúmfatalagernum + Geislasverið + Snuð + Bolur with a twist + Bjössi = Fyndinn andskoti.

Já, ég var að steggja hann Bjössa um helgina. Er núna í 2. í þynnku hérna í vinnunni og veit ekki á góða æfingu á eftir.

Ég tók fína æfingu á föstudaginn, skítþreyttur fór ég í stuð við að spjalla við Skaga-Kobba og tók 5x110kg tvisvar á bekknum eftir að hafa tekið hnébeygur.

En núna, eftir að hafa étið hlöllahlunk, 400gr. ostborgara og drukkið 5 bjóra og tekið amk 30 skot af einhverju um helgina þá held ég mig bara við brettið í kvöld yfir fréttunum.

Á morgun næ ég svo í hjólið mitt úr viðgerð, loksins loksins! Það mun kosta mig um 30þ kall, nýr framdempari og uppteinuð afturgjörð. (En já, gjörðin skemmdist þegar Lára hjólaði á mig vegna misskilnings og við hentumst bæði út í runna síðasta sumar).

Svo fer bíllinn í bón og þrif, það verður 15þ kall.

Svo þarf ég að borga háskólann þótt ég fari til danmerkur sem skiptinemi, 45þ kall.

Svo kostaði steggjunin sitt og ég er búinn að kaupa flugfarið út (10þ kall).

Djöfull er dýrt að lifa! :D

Reyklausir skemmtistaðir

2007-06-10T14:29:00.000Z

Í tilefni þess að það er orðið reyklaust á skemmtistöðum landsins þá hætti ég mér út á lífið ásamt Bjössa, Gumma og Gulla í gær.

Það er ótrúlegt hvað það munar miklu um að vera ekki á kafi í reyk. Þú sérð alla leið inn á staðina, og heldur lyktarskininu og nennir að hanga mun lengur inn á sama staðnum.

Við fórum á Kaffi París og sátum þar og sötruðum hvítvín í 2 tíma.
Og þegar það vantaði umræðuefni, þá var alltaf hægt að grípa í það hversu frábært þetta væri, að geta sötrað hvítvín í reyklausu umhverfi.

En hvað í andskotanum á það að þýða að rukka 3500 kall fyrir hvítvín hússins?
Þetta verðlag hérna á klakanum er algjör brandari.

28 weeks later

2007-06-07T00:24:00.000Z

Þetta er ágætis ræma. Ég er ekki frá því að fuglaflensan fölni í samanburði við bræðivírusinn.

Hvað er hinsvegar málið með þýðendur á þessum kvimyndum?
Hvernig gat þýðandinn þýtt "GAS", eiturskýið sem fór út um allt í ákveðnu atriði,
sem BENSÍN!

Sorglegt.

Annars gaf ég blóð í dag.